Gullas dili pasado sa street lighting?

Nakadawat na og grabeng pagsaway ang kagamhanan sa dakbayan sa Talisay ubos ni Mayor Eduardo Gullas tungod grabeng kangitngit sa South Coastal Road habig sa dakbayan sa Talisay panahon sa kagabhion.

Ang mga pagsaway niabot na ngadto sa social media nga mahibaw-an na kon sa dakbayan sa Talisay tungod sa kangitngit.

Si City Engineer Gamaliel Vicente Jr. nibutyag nga niadto pang buwan sa Enero sila nag-request og LED nga suga aron itaud sa 8 kilometros nga kutay sa SRP nga habig sa Talisay.

Iyang gibutyag nga nag-request silag 90 ka mga suga ug laingon 280 kabuok nga LED lights nga aduna’y 100 watts nga gibana-bana nga muabot og kapin sa usa ka milyon ka pesos.

Gipasabot ni Vicente nga kaniadto aduna kini suga apan gipangawat usab ang linya sa kuryenti.

Hinungdan nga karon gitauran na apan sa ibabaw nga bahin na gibutang nga dili na makawat ang electrical wires.

Sa pagkakaron, nagpaabot nalang sila kon kanus-a kini maabot sanglit ang General Services Office naman ang nahibawo kon kanua-a kini maabot.

Iyang gipasabot nga kon maabot na ang maong mga suga magpatabang na usab sila sa Visayan Electric Company (VECO) aron mao kini ang motaud.

Si Joan Vebar, pangu sa General Services Office (GSO) sa dakbayan sa Talisay miingon nga maabot sa sunod semana ang 90 ka suga nga gi-request sa taga engineering.

Hinuon, ang 90 palang ang maauna nga maoy una nilang request samtang iya pang subayon ang laing 280 ka suga nga gi-request kon asa na ang mga dukomento niini.

Gipasabot ni Vebar nga dili madali ang pagpagawas sa gi-request tungod sa kadaghan pa og agian nga mga tawo aron mopirma sa request.

Matod ni Vebar nga niadto pang buwan sa Enero gi-request sa Engineering Department ang maong mga suga, apan mitataw nga dili lang ang SRP ang angayan nga sugan apil na usab ang ubang dan sa Talisay nga ngiob panahon sa gabii.