Comelec Cebu Province mipasidaan sa mga botante batok narco-politics
Miluwat og pasidaan ang Cebu Provincial Commission on Elections ngadto sa mga botante ug mabuot nga lungsoranon nga magbantay sa narco-politics sa umaabot nga eleksiyon sa barangay aron dili mobalik sa 'kahadlok ug pinatyanay.'
Si Presiente Rodrigo Duterte ni-postpone sa duha ka higayon tungod sa kabalaka nga pagdominar sa mga sindikato sa gidiling druga sa kabarangayan nga iyang naugkat dihang nilingkod sa gahom.
Ang narco-politics maoy panagsagol sa negosyo sa gidiling drugas alang sa proteksiyon o kontrol sa gahom pinaagi sa pagpabaha og kuwarta panahon sa piniliay.
Giawhag ang mga botante nga pilion ang tarong nga mga tawo nga mahimong opisyal sa barangay.
Mao kini ang mga panghinaot ni Cebu Election Supervisor Atty. Lionel Marco Castillano isip suporta sa maayong tinguha ni Presidente Duterte sa paglimpiyo sa liderato sa kontrol ug impluwensiya sa mga dautang elemento, labina sa sindikato sa gidiling druga.
Wala na mobabag si Duterte sa eleksiyon sa baranay yg Sanguniag Kabataan (SK) apan hugot ang pamahayag sa presidente labot sa posibleng pagsulbong sa bag-ong “away” ug “pinatyanay” kon makalingkod ang mga barangay ug SK officials nga gipaluyuhan og drug money.
Leksiyon sab kini sa mga botante nga pilion ug tarong ang ilang lider kay sila ang posibleng mag-antos kon makalingkod sa katungdanan ang mga narco-politician.
Gitakda sa Mayo 14 ang barangay ug SK elections, diin ang manual nga proseso sa botasyon maoy gamiton.
Awhag ni Castillano sa mga botante nga dili palabyon ang maong adlaw, nga dili sila makabotar ug ang pagpanginlabot sa piniliay, makatabang sa kaugmaong sa nasud.
Sa lainh bahin, nagtuo si Castillano mahinungdanon ang plata-porma de gobiyerno kon itandi sa resume sa usa ka kandidato sa eleksiyon.
Una niini ang National Citizens Movement for Free Election (NAMFREL) nisugyot nga ilakip na unya sa mga rekisito alang sa mga molansar sa barangay ug SK elections ang pagpaduso usab sa ilang resume, diin makita ang ilang educational attainment ug uban pang makapalig-on sa iyang kandidatura.
Matod ni Castillano, walay nagdili sa mga kandidato nga sukipan og resume ang ilang certificate of candidacy (COC).