Sunodsunod patay tungod sa druga

Nigintang lang og duha ka oras ang nahitabong pagpamusil sa managlahing dapit sa dakbayan sa LapuLapu diin mga biktima pulos nangamatay.

Mga gipamatay gikatahong nalambigit sa ilegal drugs samtang ang mga mamumumo mga riding-in-tandem.

Sukad sa unang adlaw ning buwan sa Marso aduna nay unom ka mga kaso sa pagpamatay ang natala base sa record sa Homicide Section, Lapu-Lapu City Police Office (LCPO).

Labing uwahi nga pagmamusil nahitabo sa Mantawe Road, barangay Poblacion kagahapon sa 2:30 sa kadlawon, lawas ni Aldrin Paquibot, 26 ang natusak sa bala.

Gipahibawo ni PInsp. Wilfred Rodriguez, hepe sa Homicide base sa gihimong background check nga sa bikimta nga si Paquibot, bag-o pang nakagawas sa bilanggoan nga adunay kaso sa pagpangawat ug ang gikatahong involvement niini sa illegal drugs.

Tug-an ni SP01 Luisito Ernie, Homicide investigator nga notadong kawatan si Paquibot nga suspek sa paglungkab sa ukay-ukayan sa merkado sa Poblacion.

Siniguro ang pagpusil ngadto sa biktima sa dihang unom ka bala ang gitira ug may tama sa iyang ulo, tiyan ug ubang bahin sa iyang lawas.

Ikaduhang biktima mao si Eduardo Bering, 38 nga taga –Purok Beauty in the Sky, barangay Babag nga gibirihan kagahapon sa 12:30 sa kadlawon.

Si Bering nakadlawnan og inom uban sa iyang mga silingan ug higala diha sa ilang dapit sa dihang miabot ang mamumuno luwaon sa motorsiklo nga daling mikanaog ang angkas dayon bunot og armas hinungan nga mikaratil og panagan ang pundok sa nag-inom.