PUJ paagi-on sa SRP?

Mora og nagkasalimoang na karon ang atong mga kadagkuan sa dakbayan sa Sugbo sa pagpangita og igong solusyon nga makunhoran unta kining makasaysayon ug pinakagrabi karon nga kahuot sa dagan sa trapiko sa Mambaling, paingon na didto sa Punta Princesa ug Basak San Nicolas sa Cebu City.

Kini maoy mugna niining kinalitkalit ug dinalidali nga pagtukod sa P700 million underpass project sa eskina F. Llamas Street ug Natalio Bacalso Avenue sa Basak San Nicolas nga iya sa Department of Public Works and Highways (DPWH).

Bisan pa man sa kadaghang traffic enforcers karon nga nagpulipuli og bantay sa eskina paingon sa Sabellano Street, pabiling bumper-to-bumper gihapon ang dagan sa trapiko bisan sa halawom nang gabii.

Sa niaging adlaw, si Cebu City Mayor Tomas Osmena mipadayag nga iya karon gikonsiderar nga temporaryong tugotan nga paagi-on ang mga jeepney sa South Coastal Road sa South Road Properties (SRP) samtang gisirad-an pa ang habig sa F. Llamas sa Punta Princesa.

Wa siya mobutyag kon unsa nga rota sa mga PUJ nga iyang patugotan nga makaagi sa SRP ug asa usab nga eskinaha kini niya paliko-a aron mobalik sa iyang rota.

Samtang atong gihangop ang ilang tinguha nga mahatagan og solusyon ang maong problema, angay usab siguro tanawon ni Osmena ang sitwasyon sa SRP kon angayan ba kini sal-otan og PUJ ilabi na sa peak hours.

Naghuot na man gani nga wala pay mga PUJ, unsa pa kaha og dugangan pa kini og laing bul-og sa mga sakyanan?

Kinsa man sang mga pasahero-a ang manakay sa PUJ nga dili man residential area ang SRP?

Samot og adto ni mosangko sa habig sa Inayawan nga labaw pang way undang ang kahuot sa traffic.