Natural nga paanyag

Kasagaran nato buhaton ang tanan para mo gwapa, mo puti, mo taas, ug ma stylish tan-awon maong tanang ekspirimento himuon para makab-ot ang gimithing hitsura.

Ang uban magpaburot sa suso, magpataas sa pilok, magpa tattoo sa kilay ug ngabil, magpa kolor sa buhok, magpa-gluta aron mo puti ig magpa-piit ug pamubo sa sinena aron ma mamords ug sexy tan-awon.

Ang uban nga mi-angay sa make-over nangalipay kay daghang midayeg. Apan ang uban nga nasubrahan sa retoki wa mahimuot kay nangahibat naman hinuon ang nawong tungod sa wa magkadimaong pintal ug badlis tantong sunod-sunod sa uso ug kopya sa paboritong artista ug modelo bisag di haom sa kaugalingong pamayhon.

Ang resulta nahimong katawanan kay ang dagway mura naman hinuon og clown unya ang ngabil puwa pa sa makupa.

Ang tumong sa make-over para pa-gwapa maong diay akong mga sugyot para mas angayan tan-awon:

Maayo ang pagbutang og foundation (ma liquid o powder) sa imong nawong kay protiksyon man kini sa init nga modapat sa panit. Hinumdumi lang nga apilan ang liog sa pagbutang unya di kaayo baga ug layo sa kolor sa imong pamanit para di kabang, subra sa ka sinaw ug kaputi nga mura na hinuon og minatay nga bagong hinabwa sa pantiyon.

Inum og daghang tubig, kaon og daghang prutas ug utanon ug palayo sa mga mantikaong pagkaon aron di tantong bugason. Ayaw sab pagsegi og hikap sa nawong kay mao kini makapadaghan sa bugas-bugas.

Likaye sab ang paglugod sa mata labi na kung duna kay eyelash extension aron di kini manga-uphak ug pahak.

Ayaw sab sudlaya imong buhok samtang basa pa kay makadaot ug makalarot kini sa punoan. Pa ugha usa, una sudlaya. Ayaw kanunay higti, i-ponytail o gamit og hair dryer o iron kay maka uga ug maka pawala kini sa kasinaw og kahumok sa buhok.

Hinumdumi nga ang pagsegi og kasuko ug kusmaot kay maoy hinungdan sa pagdaghan sa kunot ug oban. Isul-ob hinuon ang imong pinaka natural nga make-up, ang imong tam-is nga pahiyom ug way limit nga katawa nga maoy sekrito sa pa-anyag!