Reunion panahon sa bakasyon
Sa mosunod nga mga adlaw mosira na ang klase sa pribado ug publikong tunghaan. Sa ato pa bakasyon na. Sa akong kasinatian mao ni ang panahon nga manurok ang daghang kalihukan. Sama sa mga torneyo sa paugnat sa kusog ug reunion sa mga pamilya. Wala pa ni labot sa mga professionals ug tinunan nga gustong maghangop pag-usab.
Ang pinaka nindot ug haum nga panahon nga buhaton iatol sa fiesta. Kung maghisgut ta og fiesta, ang tinuig nga kapistahan ni St. Gregory The Great sa lungsod sa Ginatilan saulogon ugma isip bisperas. Pagka Lunes mao na kahulogan. Mabolokon nga selebrasyon ang taudtaud nang gipangandaman sa simbahan ug sa lokal nga kagamhanan. Nalakbitan namo ni sa akong pare Randy Tragico karong bag-o ug sa akong kauban sa ABS CBN News nga si Donna Lavares lumad nga taga Ginatilan sama sa among cameraman nga si Peter Gornes.
Ang akong mga kaliwat didto sama sa nitaliwan nga musikero nga si agaw Eddie maoy madali-dali nako ug sampit labot sa kalihukan sa Nadela clan. Pinaagi niya nakaila sab nako ang ubang sakop sa pamilyang Calungsod, Quijote, Cadungog, Tocao, Quijano, Avila, Tudlas, Morelos ug daghan pa. Gawas sa Ginatilan duna pa’y daghang Fiesta nga saulogon sa mga silingang lungsod ug barangay. Sa Fiesta ang tanan magkahiusa pagpasalamat sa mga grasya nga nadawat tibuok tuig.
KOOPERATIBA
Nagpadangat nako ug mensahi ang taga CEMVEDCO kun Cebu Market Vendors Multi-purpose Cooperatives aron ipahibalo ang ilang 16th General Assembly ugmang adlawa nga adto manukad sa Grand Convention Center sa dalan Archbishop Reyes sa dakbayan sa Sugbo.
Buksan ang kalihukan pinaagi sa Santos nga Misa sa ala 1 sa hapon. Sundan dayon kini sa pagtuki sa daghang hilisgutanan labot sa ilang kooperatiba. Kini nga Coop nga gilangkuban sa Unit 1 hangtod sa Unit 3 sa Carbon Public Market. Atong pahalipayan ang sakop sa Board of Directors pinaagi sa ilang Chairman Erwin Gok-ong ug Remus Manuel isip vice Chairman. Salamat kang Mr. Rolly Lequigan usa sa mga Board of Directors sa pagpadangat ning maong pahibalo.
Mga panghinaot alang sa usa ka mabungahon nga General Assembly. Kudos kaninyong tanan.
Kung maghisgot ta og fiesta ang tinuig nga kapistahan ni St. Gregory The Great sa lungsod sa Ginatilan saulogon ugma isip bisperas. Pagka Lunes mao na kahulogan.”