Whatever you want
Morag di ko makatuo sa akong nakita. Sila si Mama ug Papa sweet na? Daw di ko masukod ang kalipay nga akong gibati niadtong tungora. Unya nakalingi sila si Mama ug Papa nako. Mapahiyumon kaayo sila nako.
“Uy, nia ka na man diay, Estrella. Gihuwat gyud ka namo.” Wa ko na makita sa nawong ni Mama ang kaguol.
“Bitaw. Magdungan tag panihapon. Nagpaluto mi sa atong katabang og lamiang mga sud-an.
Magselebrar ta ron kay mituo na si Mama nimo nga wa koy babaye.”
Nagdali kong miduol sa akong mga ginikanan. Miamen ko nila, ug unya nakahilak ko nga migakos nila. Hilak sa kalipay ang akong gibati.
“Salamat, Ma, Pa, nga nagkasinabtanay na mo.”
Nagtinan-away sila si Mama ug Papa. Unya migakos sab sila nako.
Malipayon ming tulo nga nagsawo og kaon. Morag way kabutangan sa akong dughan ang gibati kong kalipay. Ug nahunahuna ko si Randy. Husto siya. Magkasinabtanay ra gihapon sila si Mama ug Papa kon love nila ang usag usa. Ug nakita ko karon sa akong mga ginikanan nga duna gyud silay gugma sa usag usa.
Milabay ang mga adlaw. Sayo nang mopauli si Papa gikan sa trabaho kay wa na man kuno sila mag-overtime. Nasaksihan ko kaayo ang pagminahalay ug pagrespetohay nila ni Mama ug Papa sa usag usa. Wa na gyud ko makadungog nga nag-away sila. Kanunay na kong malinawon nga matulog panahon sa kagabhion.
“Say? Unsa na, nasayop ba ko, Estrella?”
Nagkatawa si Randy samtang nag-date mi sa Plaza Independencia. Nag-agbay siya nako samtang hinay ming naglakaw-lakaw sa plasa.
“Bitaw, uy. May gani kay wa madayon ang akong gusto nga magtaban ta. Unsa na kahay nahitabo nato. Salamat sab nga wa ka mosugot, Ran.”
“Naglantaw ko sa atong future, Estrella. Love kaayo tika. Di ko gusto nga maadto ka sa ka way kaseguroan nga sitwasyon.”
Unya may gihunghong si Randy nako. Nakusi ko siyag kusog sa iyang kilid.
”Di pa karon, uy, Ran. Kon makahuman na tag eskuwela ug minyo na, mahimo na kanang imong giingon nako.”
Gingisloan ko ang akong boyfriend nga mikatawa og kusog. Nagkinataw-anay mi. Puno sa kalipay ang among dughan samtang mibiya mi sa Plaza Independencia.