ISDA GIGAMIT.
Gipakita sa mga tinugyanan sa Cebu City Jail ang isda nga pakul nga gisudlan og mga sigarilyo nga gisuwayan sa pagpalusot niadtong Biyernes sa hapon ni Alex Labajo Ortega. Mokabat sa 40 ka pakete sa sigarilyo ang gisuway pagpalusot gamit ang mga pakul nga isda.
Wa na maluto ang upat ka mga pakul nga isda human nasakpan nga ang sahog niini nga unta lamas, sigarilyo diay ang sulod.
Gihimong sahog sa sinugbang isda ang sigarilyo nga gisuwayan pagpasulod sa Cebu City Jail niadtong Biyernes sa hapon.
Ban ug di na kabisita sa maong prisohan si Alex Labajo Ortega human gisuwayan pagpasulod ang mokabat 40 ka pakete sa sigarilyo sa City Jail pasado alas 4:00 sa hapon niadtong Biyernes.
Ang tunolan unta ni Ortega mao ang piniriso nga si Michael Cabanes.
Apan nasakpan ni JO1 Crisanto Cadimas, duty officer, si Ortega tungod kay ang isda nga pakul nga dala niini gitahi sa naylon mao nga sila nahibulong.
Matod sa ni Jail Warden Supt. Renante Rubio nga nahinabi sa Superbalita Cebu nga gipahiwa-hiwa pa niya ang upat ka dagko nga isda aron masuta kon naa ba kini’y dala nga shabu.
Hinuon wala’y nakita nga bisan usa nga pakete sa shabu.
Matod ni Rubio nga gatuo si Ortega nga di nila i-check ang isda nga aduna pa’y dala nga lamas diin kahibulngan nganong gaburot ang tiyan niini.
Gisulod ang sigarilyo sa laing plastik aron daghan ang masulod.
Dugang sa warden nga ila pang sutaon pinaagi sa ilang disciplinary board kon unsa ang mamahimong desisyon nila kabahin sa pag-ban kang Ortega tungod kay dili man sila makapasaka og kaso batok niini.
Sa pagkakaron naka indefinite ban si Ortega sa Cebu City Jail.
Gibutyag usab ni Rubio nga di na kini bag-o kanila nga gisuwayan pagpasulod ang kontrabando sa prisohan tungod kay sa nakalabay nga semana aduna’y usa ka person with disability (PWD) nga nigamit og sungkod aron pagsulod sa mga sigarilyo.
Pahimangno ni Rubio sa mobisita nga usa kini ka pahimangno alang sa mosuway pagpasulod og kontrabando nga estrikto sila sa pagsuta sa bisan unsa nga isulod sa prisohan. /