COCAINE NAGHULGA SA NASOD
Kapulisan sa siyudad sa Sugbo nangandam na sa posibling pagsulod sa laing matag sa drugas nga cocaine nga unang gibut- yag ni Presidente Rodrigo Duterte nga mosunod nga maghitak sa nasud tungod sa pagsulod sa mga drug cartel gikan sa Amerika ug Mexico.
Ang hepe sa Cebu City Police Office (CCPO), Sr. Supt. Joel Doria, wala mosupak niini sanglit sa nanglabay nga katuigan nakasulod na sa syudad sa Sugbo ang maong matang sa drugas nga gihulog sa kadagatan sa probinsya sa Leyte.
Tungod niini, mas pahugtan pa nila ang ilang pagbantay uban ang kaabag sa kapulisan nga mapakgang ang tinguha sa pagpalusot sa cocaine.
Gani sa ilang impormasyon, dunay nisuway og palusot sa
cocaine sa nasud pinaagi sa pagsuksok sa lawas sa isda apan nahibaw-an ra sa mga awtoridad ug nasakmit nila ang kinilo nga cocaine. “Natin nuon pa may mga cocaine na nare-recover, binabagsak yan sa dagat karamihan sa mga nakakuha nyan yung mga fishermen natin na hinuhulog lang sa dagat so sa atin probably ganyan ang mangyari kase may nag a-attempt na although nahuli pa rin,” matod ni Doria.
Ang pangulo sa Philippine Drug Enforcement Agency sa kaulohan nga si retired General Aaron Aquino nagkanayon nga dunay mga barangay sa tibuok nasud nga wala magpakabana sa problema sa ilegal nga drugas. Gani, wala silay gitukod nga barangay anti-drug abuse council (Badac.)
Awhag sa PDEA director general sa lokal nga mga opisyal sa gobiyerno nga pasakaan og kaso ang mga kapitan nga way aksyon sa problema sa ilegal nga drugas sa ilang barangay.
Si Doria nitug-an hinuon nga walay problema sa mga barangay kapitan sa syudad sa Sugbo sanglit moduso man sila sa ilang report labot sa presensya sa drugas sa ilang lugar.
Giangkon usab ni Doria nga dako og matabang sa ilang gipatuman nga gubat batok sa ilegal nga drugas ang abag sa mga barangay opisyal tungod kay sila ang nasayod kinsa sa ilang mga konstituwente ang nalambigit nga nag-abuso sa gidiling drugas.
Ang pagpuhag sa mga ilegal nga drugas labi na sa naghitak nga shabu, usa sa mga saad sa eleksyon ug prayoridad sa kampanya sa administrasyon ni Duterte. /