Tanang pulis sa Talisay negative sa drug test

Nigawas nga negatibo ang tanang pulis sa dakbayan sa Talisay nga gipaubos sa kinalitkalit nga drug test sa Cebu Provincial Anti-Drug Abuse Office (CPADAO).

Kini maoy ikaduha nang higayon nga ang kapulisan sa dakbayan sa Talisay gipa-drug test, diin ang unang gihimo niadtong Enero 20 ning tuiga diin ang city health department maoy mipahigayon.

Si Supt. Marlu Conag miingong maayo kini nga lakang aron pagsiguro nga wa siyay sakop nga tiggamitan og ilegal nga drugas.

Samtang kon nakalingkawas man sila sa unang drug test, posebling masakpan na sila karong ika-duha nang higayon.

Hinuon, gitataw ni Conag nga wala siya magtuo nga duna siyay sakop nga nalambigit sa ilegal.

Apan tungod kay wala gipahibawo ang maong kalihukan, kadtong mga pulis nga off duty gipabalik sa estasyonan ug kadtong adunay mga laing lakaw sama sa hearing sa kaso.

Matod ni Conag nga kadtong dili makapailawom sa drug test mahimong moapas sa laing estasyonan, diin ipahigayon ang laing drug test sa CPADAO.

Samtang kadtong dili gayod magpa-drug test patubagon ngadto sa Cebu Provincial Police Office.

Si Marlon Ligan, usa sa mga staff sa CPADAO, niingon nga usa na kini sa ilang mandate karong tuig nga ang kapulisan na usab ang i-drug test sa tibuok lalawigan.

Gani sa pagkakaron, niabot naman og 19 ka police stations ang nahuman na sa pag-drug test sa lalawigan ug iyang gbutyag nga adunay usa ka pulis ang giingong positibo nga gikan sa Argao Police Station.