WA MALIBANG SUD SA 37 KA ADLAW

Gipasidan-an sa iyang abogado ang usa ka piniriso nga peligro nga mamatay kon dili gihapon malibang sud sa kapin usa na ka buwan.

Si Lamarr Chambers, 24, gisikop sa kapulisan sa Harlow, Essex, United Kingdom niadtong Enero 17 ug gikasohan og duha ka counts sa paghupot og gidili nga drugas.

Sumala sa report sa BBC, ang mga pulis nagtuo nga gitulon ni Chambers ang gidili nga drugas dihang gigukod kini nila didto sa London.

Ang 24-anyos nga lalake nagdumili pag-inom og tambal pagpagawas sa iyang hugaw o ipaubos sa X-ray.

Bisan kon wa malibang, apan padayon gihapon kini nga mokaon ug moinom.

Ang kapulisan sa Essex matag adlaw mag-tweet sa update ni Chambers bahin sa ilang pagbantay nga kini mopagawas na sa iyang hugaw.

Niabot na lang og 37 ka adlaw, wa gihapon kini malibang.

Si Chambers hugot nga gibantayan sa duha ka mga pulis sa iyang selda.

Sumala sa tigpamaba sa Essex Police ngadto sa Newsweek, wala niya matino kon nakalibang na ba si Chambers.

Matod ni Dr. Robert Glatter, doktor sa Lenox Hill Hospital sa New York nga gikutlo sa The Independent, nga delikado ang usa ka tawo nga dili malibang sud na sa pipila ka semana.

Ang doktor nipasabot nga si Chambers hayan nag-antos sa fecal impaction diin ang hugaw niini naungot sa rectum.

Kini makababag sa paggawas sa hugaw sa tawo diin dili na makalihok ang mga pagkaon nga gikaon ug liquid agi sa tinai.

Si Chambers gibuhian ra hinuon sa mga pulis human sa medical ug legal nga advice ug gibasura usab sa Crown Prosecution Service ang kaso batok niini, matod ni Deputy Chief Constable Ben-Julian Harrington, dugang sa The Independent. /