Suporta sa barangay
Kon mapasar sa Dakbayan sa Mandaue ang ordinansahon nga magdili sa mga sari-sari ug convenience store nga magpainom, hayan maapektuhan ang mao nga mga negusyo. Usa ni sa mga ordinansahon sa mao nga Siyudad nga daghan ang naka-interest tungod sa epekto niini, labina ngadto sa ordinaryong mga tawo.
Naandan na ra ba sa mga kustomer nga anha ra sa mga tindahan mag-inom kay mas komportable kay di na sila molakaw og layo kon mahutdan sa inom.
Hinuon, maayo sa general public ang ordinansa tungod kay wa nay makapatakag inom sa bisan asang dapit kay gidili na ang pagpamaligya.
Daghan sa mga kagubot anha sa mga tapukanan sa manginomay mahitabo, sama sa mga sari-sari store.
Dako ang kahigayunan nga maapil ra sab ni sa daghang mga ordinansa ug balaud nga wa mapatuman.
Daghan sa mga ordinansa nga sama niini nagkinahanglan og kooperasyon sa barangay. Kon way kooperasyon ang barangay, wa gihapoy kapuslanan niini.
Sumala gud, ang Siyudad sa Sugbo dunay anti-noice ordinance pero napatuman ba? Wala kay ang mga barangay wa mohimog lakang. Tan-awa ra gud, daghan kaayo sa social media posts kabahin sa mga silingan nga naglangas langas og videoke bisan lawom na kaayong gabii.
Way bisan usa ka barangay tanod o opisyal nga namadlong kay gawas nga maikog, mahadlok usab nga maapektuhan ang base sa pulitika.
Mao na nga bisan maanindot ug maayo ang tumong sa ordinansa sa Mandaue City, kadudahan pa kaayo kon mapatuman ba kini. Maayo unta ipatawag ni Mayor Luigi Quisumbing ang mga kapitan aron hangyuon nga hugot kining ipatuman aron makadulot og seguro ang ngipon.