Makapabata

Niay good news alang sa mga sama nako, hilig og biseklita. Napalgan sa pagtuon nga ang pagbiseklita mopugong sa pagkatiguwang ug mopabaskog ug mopalab-as sa immune system. Mao ni ang nakaplagan sa pagtuon nga gimantala sa Aging Cell.

Nakaplagan pa sa pagtuon nga ang gibag-on sa muscle ug kusog mapreserbar, samtang stable ang levels sa cholesterol ug body fat.

Gawas nga duna kini maayong epekto sa pagkatiguwang sa tawo, niabot pa kini ngadto sa immune system. Ang organ nga gitawag og thymus, nga manghimog immune cells, nga magsugod pagkuyos sa edad nga 20 anyos. Apan, matod sa pagtuon, nga nakaplagan nga ang thymuses sa mga hamtong nga cyclists nanggama og T-cells nga sama kadaghanon sa mga batan-on.

Kining mao nga pagtuon natala sa The Guardian.

Mao lagi ang nakaayo sa cycling, usa ka matang sa exercise, kay mopalig-on sa imong lawas.

Gahi masakit

Kaniadto sa grabe pa ko mobiseklita, uwan-init ang akong tindak. Pero wa ko makahinumdom nga gihilantan ko o gisip-on niadtong mga panahuna. Bisan gani mosulod ko sa opisina nga bugnaw kaayo ang aircon ug gikan ko sa init, wa ko makasinati nga maglain ang akong lawas.

Mao to ang epekto sa pagsige nako og sikad niadtong mga panahuna. Milig-on ang akong immune system batok sa mga sakit bisan kon dunay mga higayon nga angay na untang mapalyar ang akong lawas. Sama nianang mag-usab usab ang panahon ug maabugan ko. Dali ra kong madutlan og abog tungod sa akong allergic rhinitis.

Mas nindot ni nga exercise kay maora lagi ka og misuroy lang sa kabukiran, apan nag-exercise ka na diay.

Environment

Sa kahuot sa trapiko karon, ang motorsiklo, scooter, biseklita ug electric bikes nagkadaghan. Mas maayo gani unta baratuhan sa mga tindahan ang ilang gipaninda nga mga e-bike aron daghan ang maengganyo. Kay gawas nga mas makadaginot ka sa e-bike, mas luwas ni padaganon kay sa mga motorsiklo.

Ang nakaayo pa gyud niining biseklita ug e-bike, makapaminos sa gibuga nga aso. Mas daghang mobiya sa de makinang mga sakyanan, mas labing maayo. Mas daghang mga biseklita ug e-bike sa kadalanan,mas labing nindot. Mominos ang pollution tungod kay gamay na lang nga mga sakyanan ang managan sa kadalanan.

Kataw-anan baya kay sa adunahan nga mga nasod, nagkaminos ang mga sakyanan nga de makina kay electric ug biseklita ang giduso. Sa atoa, nagpinalitay og sakyanan ang mga tawo aron dunay ikapasigarbo bisan nangatanggong kada adlaw sa trapiko.