From the time you say “I love you”
Sa tan-aw ko kang Gemar, nahubog na siya. Daghan na ang nainom niyang beer. Usa gud sa among barkada nag-birthday party ron sa ilang balay. Human sa panihapon, mi-join ko kang Gemar sa gilingkoran niyang lamesa. Softdrinks lang ang akong giinom. Ang uban namong barkada didto sa laing lamesa. Nahibulong man gani ko kay wa man moipon si Gemar nila.
“Morag duna kay problema, da, Gem. Lovelife? Sus, ikaligo lang na, uy. Sure ko nga mawagtang na.”
Wa motubag si Gemar. Mitan-aw nuon siyag dugay nako. Naglu’oy ang iyang mga mata, Katulgon na tingali tungod sa kahubog.
“Si Sheena ba ang hinungdan? Tell me, Gem. Friend gud ta.”
“Si Sheena? Sus, panakipbutas lang na siya, uy!”
Nakugang ko. Panakip-butas? Ngano gung nakaingon man si Gemar ani? Almost one year na ang ilang relasyon. Klasmet ko si Sheena. Parehas mig kurso nga gikuha. Laing kurso ang gikuha ni Gemar. Nagkabarkada ming tulo si Gemar ug Sheena kay klasmet man mi sukad sa elementarya hangtod na sa pag-graduate namo sa hayiskol sa among lungsod. Nagkasabot mi nga usa ra ka university ang among eskuwelahan dinhi sa siyudad.
Kauban mi si Sheena sa pagpuyo sa boarding house sa Jakosalem, samtang si Gemar nagpuyo sa boarding house sa Sanciangko.
“Don’t say like that, Gemar!” Nataas ang akong tingog. Wa ko makagusto sa iyang gisulti. “Close friend ko si Sheena. Ayaw siya pasakiti.”
“Tinuod man sab ang akong giingon ba, Sofia. Wa man koy love kang Sheena. Nakigrelasyon lang ko niya aron makalimtan ko ang girl nga tinuod kong gimahal. But no way. Seguradong di siya makagusto nako.”
“Nganong di man siya makagusto nimo, Gem? Unsa man siya, minyo? Duna nay uyab?”
Bisag hubog na si Gemar sa akong paniid niya apan tarong gihapon siyang manulti.
“Ah, basta di siya makagusto nako.”
Nakapanglingo na lang ko. Gipatindog ko si Gemar. Gusto kong mamauli na mi. Sus, ang kanahan, naglisod pagtindog. Kabug-at ra bang tawhana kay taas man siya ug macho pa gyud. Hapit ko masarasay kay di na man siya makatarong paglakaw.
Unya naluoy kong naghunahuna kang Sheena. Naglaom ra ba siya sa gugma ni Gemar niya.