Mga karakter sa sugilanon

R“ OY, kining mga karakter sa imong mga sugilanon, bisag lain ang mga ngalan dinhi sa imong mga sinulat, tinuod man gyud ning mga tawo. Kaila man ko ini nila tanan!” matod ni Glenda, akong kapikas, samtang nagpakli sa mga kopya sa SUPERBALITA nga akong gi-compile, hinugpong sa mga kopya diin napatik ang akong mga sugilanon.

Nakalugar karong buntaga si Glenda sa pagpamasa sa akong mga sugilanon kay malingaw man sab siya sa akong mga sinulat. Sabado karon sa buntag ug human na mig pamahaw. Mitupad siya nako sa sopa nga akong gilingkuran sa sala samtang nagsulat kog sugilanon sa likod sa scratch bond paper nga akong tinigom. Nangyamiid siya nga mikomentaryo sa akong mga sugilanon.

“Unsa may dautan ana?” matod ko nga miundang pagsulat. Naputol ang akong train of thoughts. Kami rang duha karon sa among balay sa Bacayan, kay ang among kinamaguwangang apo nga si Abeth, nga giatiman namo gikan sa Lunes ngadto sa Biyernes, gikuha sa iyang amahan. .

Semi-retired na ko sa pagtudlo og Accountancy. Nagsalig na lang ko sa mga kliyente nako nga nagpagunit og mga libro nga nagkinahanglan sa akong pirma isip CPA. Apan sa batan-on pa ko ug ulitawo pa nga estudyante, nagsige na kog panulat alang sa mga tabloid. Giapilan nako ang tanang tigi sa sinulatay bisag wa ko kadaog og dagkong premyo. May mga sinulat man sab ko nga nauyonan sa editor ug nangapatik.

“Dautan man ang nahitabo

nila sa sugilanon!” ni Glenda.

“Pero sa tinuod kinabuhi, way nahitabo nila. Di ba?” matod ko.

“Nagpaila lang na sa kadautan sa imong hunahuna batok nila,” ni Glenda.

“Ang kadautan sa hunahuna o laraw, kon wa gyud buhata, way dautang mahitabo. Tinuod hinuon nga duna koy daghang dautang hunahuna batok sa akong mga kaaway, apan kutob ra kini sa sugilanon. Di ko kamaong mobuhat og dautan,” giingnan ko si Glenda.

“Kining sugilanona, o, mahitungod man ni adtong gihagisan ka ni Manoy,” ni Glenda.

“Tinuod na. Gihagisan ko niya. Apan misukol ba ko? Nidagan ko, bahag ang ikog. Nitago ko sa ato. Apan nagimagine ko unsay nahitabo kon nisukol pa ko. Kana maoy miguwa sa sugilanon,” matod ko kang Glenda nga nagpakli-pakli sa pinunpon nga mga SUPERBALITA.

“Kining usa, mahitungod sab ni sa iyang asawa,” padayon nga sulti ni Glenda.

“Husto ka. Ang iyang asawa. Ang iyang asawa puw- erte ka-libakera, apan nasupo ug na-leksiyon sa iyang ka-bagibian! Dunay mga moral lesson ang akong mga sugilanon; maong dunay bili nga mamantala alang sa mga editor.” Nanghambog ko.

“Kini sab. Ang giigo nimo ini kay si Jovier Campus, akong ig-agaw nga tag-iya sa Junior’s Vulcanizing,” ni Glenda.

“Husto ka. Ang ig-agaw nimong pwerte ka-garbuso gikidnap ug gipa-ransom. Maayo kay wa patya,” matod ko.

“Mora man sab kag nagtunglo sa imong mga silingan sa imong mga sugilanon!” ni Glenda nga nagmug-ot.

“Ang dautang hunahuna ug pagbati naa na na sa tawo sukad pa sa pagbuhat sa kalibutan. Lahi lang karon, kay duna na man tay gitawag og ‘outlet.’ Imo lang isulat mauhupay na kana. Kaniadto sa panahon ni Cain wala siyay ‘outlet’ sa iyang kasina batok kang Abel. Mahimo ra man ta tog magsulat si Cain og sugilanon mahitungod sa iyang kasina kang Abel. Apan wa pa maimbento ang lapis ug papel, printer o computer niadtong panahuna. Mao na nabuhat ni Cain ang iyang dautang hunahuna. Ang akong dautang hunahuna batok sa akong isigka tawo ako lang isulat.”

“Mao ba? Kanang maglaraw ka pagpatay, duna say mamatay sa imong sugilanon?”

“Mao gyud. Apan kutob ra diha sa sugilanon. Mahadlukon ko sa Diyos. Unsa na man lay bili sa atong pagsimba?” giingnan ko si Glenda.

“Aw, lagi!” tuaw niya. Unya nahilom siya kay mitutok pagbasa sa usa ka sugilanon. Ug mipadayon ko sa akong pagsulat. (KATAPUSAN)