Kahigayonan gipahimuslan
Ako si Judith Daral, 50, taga Sta. Lucia, Asturias, Cebu ug may duha ka mga anak. Napulo ka tuig na ako sa akong negosyo nga galingan sa mais ug baboyan.
Lisod ang akong kinabuhi niadtong wala pa mi nagsugod sa among mga negosyo, kay wala gyuy klaro ang among kita kada adlaw.
Gamayra among kita alang sa pagpalit og pagkaon ug bitamina sa among mga baboy.
Mangutang mi sa bangko aron lang naay pangdugang nga capital, apan sa dako kaayo nga interes.
Sa dihang aduna kami tigom sa programang 4Ps sa gobiyerno, naay nakahisgot kabahin sa RAFI Micro-finance, Inc. (RMF). Wala gyud ko magduhaduha sa pag-apil aron lang gyud may pangdugang nga kapital.
Dako gyud ang akong pasalamat sa Ginoo kay iya kaming gigiyahan sa pagpalambo sa among pagnegosyo. Nilambo ang among baboyan ug nakapundar sab kami alang sa osa ka galingan og mais.
Tungod sa among paningkamot sa akong bana, nakahuman na ang usa namo ka anak sa kolehiyo ug karon usa na ka magtutudlo.
Ang ako lang gyud masulti alang sa uban nga nangandoy nga maarang-arang ang kinabuhi mao nga mokugi lang gyud ug pahimuslan ang kahigayonan nga moabot.
Tinuod walay kasigurohan ang tanan, apan mosalig lang gyud sa Ginoo. Kay kon bisan aduna pa may pagsuway nga moabot, magmalig-on lang gyud kay Siya ang mas nakahibawo sa tanan.
Sa dihang niabot ang kahigayonan nga makapanghuwam aron himoong kapital o puhonan sa pagpalambo sa iyang negosyo, wala palabya ni Nanay Judith ang maong oportunidad.