YES, I DO: SOULMATE

Sa atong pagpuyo dinhi sa kalibotan, makahimamat ta og mga tawo nga sa atong pamati dugay na natong nakaila o gaan na dayon ang atong pamati ngadto nila bisan sa hamubo nga panahon nga sila atong nakauban.

Ingon niini usab ang gibati ni Rowena ‘Wena’ Sayson-Dimabuyu dihang iyang nahimamat ug nahimong higala ang iyang kapikas sa kinabuhi nga si Oliver Dimabuyu.

Nagsugod ang panaghigalaay sa duha niadtong 2016 pinaagi sa chat sa Facebook.

Si Oliver ang nag-friend request ni Wena.

Si Oliver tua manarbaho sa California, U.S.A. isip supervisor sa usa ka global security and aerospace company.

Nagkaila ang duha pinaagi sa amiga ni Wena nga kanhi hinigugma sa ig-agaw ni Oliver.

Si Wena niasoy nga dali nigaan ang iyang pamati ngadto kang Oliver.

Bisan kon 11 ka tuig ang gintang sa ilang edad, apan wa kini makababag sa ilang paghimo og mga desisyon ug sa mga butang nga gustong buhaton sa matag usa.

“Feel nako dugay nami nagkaila. Dali ra kaayo mi magkasinabot sa tanan,” pamulong ni Wena.

Niadtong Enero sa miaging tuig, unang higayon nga nagkakita sa personal sila si Oliver ug Wena.

Ang duha nagkauyab niadtong Marso 30, 2017.

Ang respeto ug pagsalig sa usag-usa nakalahutay sa ilang relasyon bisan sa ilang long distance relationship.

Nakadayeg si Wena sa pagka buotan, family-oriented, ug pagkakugihan ni Oliver kinsa iya usab gihulagway nga maamomahon, responsabli ug mapinanggaon nga amahan ngadto sa duha ka mga anak niini.

Sa ikaduhang pag-uli ni Oliver niadtong Hulyo 2017, nakahukom ang duha nga magpakasal.

Ang Christian wedding nahitabo sa Chateau de Busay sa dakbayan sa Sugbo niadtong Pebrero 7, 2018.

Solemne ang garden wedding nga gisaksihan sa isig ka pamilya, mga kabanay ug mga higala nila ni Oliver ug Wena.

Ang mga kaliwat ni Oliver gikan sa Pampanga nituyo og anhi sa Sugbo aron duyogan kini sa espesyal nga adlaw sa iyang kinabuhi.

Burgundy ang motif sa ilang kasal nga gihan-ay ug gipahimutang sa inila nga wedding coordinator sa nasod nga si Carlo Abaquita uban sa abag sa photographer, Macky Carcedo; gown gikan ni Bernardo Flores; ug makeup artist, Romero Vergara. /

/ MGA HULAGWAY GIKAN NI MACKY CARCEDO ■ SOULMATES: Padung maghawok ang bag-ong kinasal nga sila Oliver ug Rowena Dimabuyu human sa ilang garden wedding. Bisan kon dili pa dugay ang ilang relasyon apan gaan na ang pamati sa usag-usa nga daw sama sa dugay na sila nga managkaila.