2-0 TUYO SA BEER
Mosuway pagposte’g 2-0 nga bintaha ang San Miguel Beermen sa ilang pagpakighinubganay og balik sa Brgy. Ginebra Gin Kings sugod karong alas 6:30 sa gabii sa Game 2 sa ilang best-of-7 semis series sa Philippine Basketball Association (PBA) Philippine Cup sa Araneta Coliseum.
Ang Beermen nakasandig sa ilang reserbang mga magduduwa aron pasukarapon ang Gin Kings, 102-90, sa Game 1 niadtong Biyernes.
Sa Game 1, ang Sugbuanong higante nga pambato sa Beermen nga si JuneMar Fajardo igo ra nakamugna og siyam ka mga puntos apan natapakan kini gumikan sa maayong duwa sa ilang mga reserba hilabi na si Von Pessumal, kinsa nagpakatap og career-high nga 18 puntos.
“They were sagging on June Mar, and June Mar helped his teammates as a facilitator,” matod ni Beermen coach Leo Austria nga napatik sa PBA.ph.
Ang ubang starters sa Beermen maayo gihapong nakaduwa. Nimugna og 23 puntos si Arwind Santos, nihatag og 17 puntos si Marcio Lassiter, nidugang og 15 puntos si Alex Cabagnot samtang si Chris Ross igo ra man tuod niamot og unom ka puntos apan ang iyang paghasolhasol isip pointguard nakatabang og dako sa Beermen.
Ang Gin Kings mingsaad nga mopakita og mas saktong labok ning higayuna, naa o wala ang ilaha sab higante nga si Greg Slaughter, kinsa wala nakaduwa sa Game 1 tungod kay aduna kini angol.
“We can play better than we played tonight, that’s for sure, with or without Greg,” matod pa ni Ginebra coach Tim Cone human sa Game 1.
Gitataw ni Cone nga wala pa sila masayod kon makabalik ba’g duwa si Slaughter alang ning maong series hi- nungdan nga kinahanglan nilang mangandam og insakto nga wala ang produkto sa University of the Visayas (UV) Green Lancers.
“We don’t know yet. I hope he (Slaughter) will get back at some point. I can’t tell you whether he’s gonna be ready for next game or not”, matod ni Cone.
“He hasn’t to get on the court yet to practice, so at this point its still gonna be a couple more days before we get him back.”
Dugang problema sa Gin Kings mao ang pagpadaplin nila ni Mark Caguioa ug Paolo Taha, nga parehong dili makaduwa ning higayuna tungod kay pareho kining naangol sa Game 1.
Gipasalig sa Gin Kings nga andam modoble’g kayod ang nahabilin nilang mga magduduwa aron makatabla sa series.