Serbisyo sa TCH apektado karon

Tukion sa Sangguniang Panlungsod sa Toledo ang 2018 annual budget sa session niini karong ala 1 sa hapon, pipila ka adlaw human 106 ka mga trabahante sa Toledo City Hospital (TCH) ang gipaundang sa trabaho.

Si Toledo City acting Mayor Antonio Yapha, niduso sa gisugyot nga budget, nagtuo nga ang wala pagpalabang sa budget kay dunay kalambigitan sa pulitika.

“Very unified council, usa ra ka tawo ang momandar, ang ilang gituman ang ila rang amo,” padayag sa acting mayor nga wa mohingan kon kinsa nga amo ang iyang gipasabot.

Apan una nang gidudahan nga si suspended Mayor John Henry “Sonny” Osmeña ang gipasabot niini nga giingong nidiktar sa konseho.

Ang Superbalita Cebu makadaghan nitawag nila ni Osmeña ug acting Vice Mayor Joie Perales aron pagkuha sa ilang habig, apan wa kini motubag sa mga tawag o mo-reply sa mga text message.

Si Dr. Bonito Zanoria, chief of hospital sa TCH, niangkon nga naapekihan ang mga serbisyo sa tambalanan sa pagkahunong na sa trabaho sa 106 ka contractual nga mga empleyado.

Matod niya, gisirad-an na ang ilang Tuberculosis-Directly Observed Treatment Short Course (TB-DOTS) Program ug ang Animal Bite Treatment Center kay wala nay makabantay gumikan sa kakuwang sa iyang mga sakop.

Dili siya gusto nga mag-apilapil kon unsa man ang kasungian sa pulitika sa mga opisyal sa ilang siyudad.

“Ang akong giampo nga maaprobahan ang budget... Kini ako, trabaho lang, dili partisan. Kon pulitika pa ni akoa, dili ko makig-estorya sa duha (Osmeña ug Yapha) asta sa council,” dugang ni Zanoria.

Gumikan kay wala nay ikasweldo kay wala pa maaprobahi sa konseho ang 2018 annual budget, gipahunong na og trabaho ang 106 ka job order nga mga empleyado, 52 ka mga nars, 6 ka mga doktor, may midwife, medical technologist, drayber ug ubang mga kawani.

Si Zanoria niingon ang mga pasyente nga naa sa delikado nga kahimtang ug kinahanglan nga operahan ang i-refer sa silingang Balamban Provincial Hospital ug Vicente Sotto Memorial Medical Center.

Kagahapon, usa ka lalake nga biktima sa pagpamusil ang gipaadto sa VSMMC kay dili makaopera ang TCH.

Si Zanoria nipasabot ang ilang manpower karon sibo sa usa ka infirmary nga maoy status nila.

Si Provincial Health Officer Dr. Rene Catan niingon mopadala sila og doktor ug nurses kon mohangyo ang kagamhanan sa siyudad sa Toledo.