Samsam batok Bucao sa Talisay sa 2019?

Gikabalak-an nga mabuak ang partidong Alayon sa dakbayan sa Talisay ilabi na sa 2019 eleksyon.

Nasayran nga migawas karon ang taho nga si Kongresista Samsam Gullas posibling maoy modagan sa pagka-mayor sa Talisay.

Sapagkakaron, ang konseho nga gipangulohan ni Bise Mayor Alan Bucao pulos sakop sa Alayon Party.

Si Mayor Eduardo Gullas una nang namahayag nga di na siya modagan sa 2019 tungod sa iyang pangidaron nga 88 anyos.

Apan karong bag-o si Gullas nga nahinabi sa mga tigbalita miingon nga layo pa ang eleksyon apan ang mayor nibutyag usab nga sa iyang pangidaron matag adlaw nga molabay iyang pasalamatan ang Labawng Makagagahom.

Matod sa presidente sa Associatin of Barangay Council nga Barangay Kapitan sa Bulacao nga si Raul Cabanero nga bugtong makapahiusa sa ilang partido mao ang pagdagan og balik ni Gullas isip mayor sa Talisay.

Kini tungod kay kompleto paman ang ilang grupo ug aduna lay duha unya ka mga konsehal ang hulipan kinsa anaa na sa katapusan nilang termino nga sila si Konsehal Choy Aznar ug Konsehal Val Ylanan.

Apan sa higayon nga di na modagan si Gullas kasaligang tinubdan sa Superbalita Cebu nibutyag nga si Bise Mayor Alan Bucao modagan sa pagka-mayor.

Hinungdan nga mabuak silang grupo sa Alayon sanglit kay sigun sa report aduna may madala unya si Bucao nga mga konsehal karon sa ilang grupo.

Matod pa nga duha ngadto sa tulo ka mga konsehal ang mokuyog unya ni Bucao ug posibling madugangan pa kini.

Hinuon si Bucao nga nahinabi sa mga tigbalita nibutyag nga ang iya karon mao lang ang pagtabang sa administrasyon ni Gullas dungan sa pagsulti nga matag usa adunay ambisyon apan mitataw nga di pa angayang hisgutan ang politika.

Usa sa mga sakop sa partido mibutyag nga dako ang kahigayonan nga modagan si Bucao kon di na modagan si Gullas, ilabi na kon di si Bucao ang paluyohan sa partidong Alayon sa 2019 elections.

Nasayran nga sibaw karon ang istorya sa Talisay nga adunay karoy nagkonbinsir si Kongresista Samsam Gullas nga padaganon sa pagka-mayor sa Talisay.

Samtang si Mayor Gullas kon modagan man sa sunod tuig mobalik kini sa Kongreso tungod kay gawas nga di dako og trabaho di usab mahago sa kampanya sanglit ang mga mayor naman sa tanang lungsod maoy mangampanya alang kaniya.

Nasayran ang mga mayor sa tibuok unang distrito nga gilangkuban sa tulo ka siyudad ug tulo ka lungsod pulos man sakop sa Alayon party.

Hinuon si Samsam nagdumili una paghatag og pamahayag.

“Unya nalang nato na tubagon sa saktong panahon, Boss“nagkanayon ang text sa kongresista.