LAWAS SA PUYA NATUNGA

Putol nga lawas sa puya nga bag-o lang natawo nakaplagan sa mga residente sa Maria Luisa Estate Park, Barangay Busay, dakbayan sa Sugbo, nga gitangag na sa iro nga gisulod sa usa ka plastic bag.

Alas 4:30 sa milabayng hapon sa dalan John-john eskina Michael sulod sa village unang nakabantay si Romeo Oros nga dunay gitangag ang mga iro.

Wa mahibaw-i kon babaye ba o lalake ang puya tungod kay nahurot ang katunga sa lawas niini.

Matod ni SPO1 Winston Ybañez, imbestigador sa Homicide section sa Cebu City Police Office nga gisulod ang bata sa usa ka plastic bag.

Gibana-bana nga walo ngadto sa siyam ka buwan na kini tungod kay kompleto na ang mga parti sa kalawasan.

Gibana-bana sa kapulisan nga bag-o pang gilabay ang puya tungod kay init pa ug duna nay pusod ug inunlan.

Gituohan nga ang hinungdan sa pagkaputol sa lawas sa bag-ong natawo nga bata tungod kay gikaon na sa iro nga maoy unang nakakaplag niini nga gilabay sa kasagbutan.

Nakig-alayon karon ang Homicide section sa mga tag dumala sa village ug barangay sa pag-ila sa milabay.

Gitan-aw nila ang kuha sa CCTV camera sa village apan wa makuha ang dapit diin nakit-an ang lawas sa bata.

“Among bana-bana ani niya kay 8 to 9 months na ning bata kay kompleto naman ang lawas sama sa ilong, dunggan ug mata,” matod ni Ybañez.

Ipasusi usab nila sa barangay kon aduna bay nagmabdos sa maong dapit nga nanganak na apan walay bata nga naa sa ilang panimay.

Kini na ang ikaduhang higayon nga dunay puya nga gilabay nga wala nay kinabuhi.

Niadtong miaging adlaw adunay bata nga gisulod sa plastic nga gibilin sa gawas sa mall sa Barangay Apas nga gibinlan pa og suwat ug P1,000 nga cash.