P200T SA MAKATUDLO SA KILLER

SAN FERNANDO LGU MITANYAG OG GANTI

Ang kagamhanan sa lungsod sa San Fernando, Sugbo nagtanyag og P200,000 nga reward ni bisan kinsang tawo nga makahatag og impormasyon sa kapulisan kinsa ang mga suspek nga ningpatay kang Konsehal Alexander Alicaway.

Si San Fernando Mayor Lakambini Reluya, sa interview sa SunStar Cebu, nanawagan usab sa kapulisan sa paghulma og local task force nga motabang sa pagsulbad sa pagpatay ni Alicaway.

“The local police need to conduct a deeper investigation on this,” sulti ni Reluya sa SunStar Cebu kagahapon.

Si Alicaway, 49, gipusil patay sa wa mailhing duha ka mga tawo sa Barangay South Poblacion, lungsod sa San Fernando niadtong Miyerkules sa hapon.

Si Reluya niingon nga ilang nahukman ang paghatag og cash reward atol sa tigom nila ni Vice Mayor Fralz Sabalones ug mga department head sa lungsod niadtong Huwebes.

Ang kwarta, nga gikan direkta sa lungsod, makatabang sa pagkuha og mga saksi nga makatudlo sa nagpaluyo sa pagpatay ni Alicaway.

Samtang gipanghimakak ni Reluya nga siya ang nagpaluyo sa pagpatay kang Alicaway.

Matod ni Reluya nga tuod managkaatbang sila og partido ni Alicaway, di siya makaako sa paghimo og linuog nga mga lakang batok kang Alicaway ug sa iyang mga kaatbang.

Ang pamahayag ni Reluya iyang giluwatan human ang pamilya ug mga supporter ni Alicaway nipadayag sa mainstream ug social media nga ang kamatayon sa opisyal may kalambigitan sa pulitika.

Si Alicaway, kinsa dugay nang konsehal, padung sa San San Fernando Municipal Hall aron paghatod sa suwat nga iyang giplanong tukion sa session karong Lunes dihang gipusil patay sa duha wa ka wa mailhing mga mamumuno nga nagmotorsiklo.

Ang suwat, gikataho nga gikan sa wa mailhing tinubdan, nag-ingon nga ang administrasyon karon sa San fernando gikatahong ilegal nga namaligya sa di na mapuslan nga mga sakyanan ug heavy equipment isip scrap metal nga wa ipailawom sa bidding.

Matod ni Reluya nga iya na kining gipaimbestigar, apan wa siya masayod sa transaksyon.

Ang suwat iyang gihulagway nga “hearsay” mao nga wa maapil sa agenda karong Lunes.

Si Reluya niawhag sa pamilya ni Alicaway sa pag susi sa “all angles” sa kamatayon sa konsehal. /