■DUGAY PA MASUGDAN.
Ang pagtrabaho sa depressed structure kun underpass sa UN Avenue sa Dakbayan sa Mandaue dugay pang masugdan. Matod ni Kenneth Cobonpue, chairman sa Regional Development Council (RDC) 7, daghan pang trabahuon sama sa pagbalhin sa mga kable sa kuryente ug tubo sa tubig una pa masugdan ang proyekto.
Daghan pa ang angay trabahuon sa dili pa masugdan ang paghimo sa depressed structure sa U.N. Avenue, siyudad sa Mandaue.
Si Kenneth Cobonpue, chairman sa Regional Development Council (RDC) 7, niingon nga dunay mga poste sa kuryente ug mga kable sa kuryente ug mga tubo sa tubig ilawom sa dapit nga angay ibalhin sa laing lugar.
"That is dangerous when you hit a power line, blackout gyud tanan," pahayag ni Cobonpue.
Si Betty Martinez, tigpamaba sa National Grid Corp. of the Philippines (NGCP), nikompirmar nga naay underground cable sa duha ka circuits sa 138 kilovolts Line sa lugar diin moagi ang kuryente alang sa isla sa Mactan ug Mandaue.
Si Charmaine Rodriguez, tigpamaba sa Metropolitan Cebu Water District (MCWD), niingon nga duna sila'y main line sa tubig sa dapit paingon sa ikaduhang taytayan nga maoy agian sa tubig nga gikan sa Carmen.
Matod niya, moagi og bidding if naay tubo nga maapektuhan sa proyekto kay kinahanglan i-reroute ang kasamtangan nga tubo nga naa na diha.
Si Glenn Anthony Soco, co-chair sa Infrastructure Development Committee sa RDC 7, namahayag kinahanglan mahuman usab sa Department of Public Works and Highways ug contractor ang pagpalit sa luna nga gamiton sa road-rightof-way aron dali na sa higayon sugdan ang proyekto.
Suma pa niini, nakaduso na og initial nga traffic management plan ang DPWH labot sa proyekto. Apan gusto niini nga mahuman una sa Japan International Cooperation Agency ang master plan nga matapos sa ikatulong quarter ning tuiga.
Mopaluyo sila sa mga proyekto bahin sa traffic management system.