Grab mihatag og traffic enforcers’ vest sa City
Gihatagan sa Grab Philippines ang Cebu City Government og 200 ka reflectorized vests para dali nga makita sa mga motorista ang mga Barangay Intelligence Network panahon sa gabii .
Si City Administrator Nigel Paul Villarete nidawat sa tulo ka dagkong kahon nga gisudlan sa vests nga gihatod sa mga opisyal sa Grab, usa ka ride-hailing app, didto sa Office of the Mayor. Si Mayor Tomas Osmeña didto sa Bohol kagahapon.
Si Leo Gonzales, public affairs manager sa Grab, nagkanayon nga gusto sa ilang kompaniya nga makigtambayayong sa mga local government unit hilabi na ang paghatag og tabang.
Matod ni Gonzales nga mahinungdanon para kanila ang siyudad sanglit kini ang labing dako nga merkado gumikan sa kadaghan og tawo nga mahimong kliyente sa Grab.
Si Villarete nihangop sa tabang sa Grab kansang prayoridad mao ang paghatag og maayong transportasyon ug seguridad sa katawhan.
Samtang gipadayag ni Raymond Dejan, senior city manager sa Grab Cebu, nga hatagan usab nila sa mosunod nga mga adlaw ang mga barangay sa Cebu City nga nahimutang national highway.
Kini aron magamit usab sa ilang mga barangay tanod ug ubang volunteer kinsa maoy modumala sa trapiko hilabi na panahon sa peak hours sa siyudad.
Gawas sa Cebu City, nahatagan na usab sa Grab ang dakbayan sa Bacolod ug andam silang motabang sa ubang mga LGU nga nanginahanglan sa dinaliang pagpatuman sa operasyon sa Grab.