P12.5-B San Fernando recla project , international port gitugotan sa CPA

Gihatagan na og go signal sa Cebu Port Authority (CPA) ang First Sangat San Fernando International Port (FSSFIP) nga makasugod sa construction sa P12.5 bilyones nga private port ug reclamation sa Barangay Sangat, lungsod sa San Fernando.

Ang CPA pinaagi ni General Manager Angelo Verdan, niisyo og provisional permit to construct private non-commercial port ngadto sa FSSFIP niadtong Enero 29 diin kini balido gikan Pebrero 1 hangtod Agusto ning tuiga ug ma-upgrade human sa unom ka buwan.

Si Ruben Feliciano, ang presidente sa FSSFIP, nihangop sa pagluwat sa CPA sa maong dokumento sanglit kini nalang ang ilang gihuwat para pormal na silang makasugod sa pagtrabaho.

Matod pa sa presidente sa FSSFIP nga sa higayon nga mahuman na ang multi-billion nga pasilidad, makahatag kini og libuan ka mga trabaho sa mga taga San Fernando ug kasikbit nga mga local government unit (LGU) ug posibleng maoy makapahimong siyudad sa SF sa umaabot nga panahon.

“This gonna be the driving force in the pursuit of sustainable development and management so that the poor people had the opportunity to escape poverty to uplift the socio-economic condition of the community for additional revenue and employment.” paghulagway ni Feliciano sa FSSFIP nga adunay 41 ektaryas nga gilapdon nga proyekto.

Si Mayor Tomas Osmeña una rang nibutyag nga pabor siya nga ibalhin ang Cebu International Port (CIP) diin nahimutang ang libuan ka mga container van sanglit usa kini sa hinungdan sa grabeng kahuot sa trapiko sa Cebu City gumikan sa kadagko sa mga prime mover ug trailer.

Ang FSSFIP nakakuha na usab og Environmental Compliance Certificate gikan sa Department of Environment and Natural Resources (DENR) ug giisyuhan na usab og “notice to proceed” sa Environmental Management Bureau sa nilabay nga tuig ug ubang mga permit may labot sa proyekto.

“Pasalamat ko kay Mayor Lakambini Reluya, LGU of San Fernado and the barangay council of Sangat, the fisher folks because they already favorably endorsed the project.” dugang ni Feliciano.

Gawas sa trabaho nga mahatag sa tagdumala sa FSSFIP, mopasiugda usab sila og scholarship program para sa mga estudyante sa maong lungsod kinsa walay ika-afford sa pagtungha unya sa kolehiyo ug ubang mga benepisyo gawas sa minilyon nga buhis nga makobra sa lungsod.