Kahusay’g kalinaw sa Sugbo nagusbat na?

Laing opisyal na usab sa lungsod ang gipatay sa niadtong Miyerkules sa hapon sa wala mailhing mamumono sa lungsod sa San Fernando, Sugbo. Gitumbok mao ang kamatayon ni San Fernando Councilor Alexander Alicaway kinsa gipusil-patay sa duha ka mga tawo nga nagsakay og motorsiklo nga nagsul-ob usab og bonnet.

Hangtod ning pagsulat, wala pay maila kon kinsa ang mga gunmen o kaha kinsa usab ang nagpapatay sa konsehal nga gihulagway sa iyang mga silingan nga buotan.

Nianang pagka-Martes, usa ka adlaw sa wala pa ang hitabo, gipusil-patay ang usa ka aktibong pulis sa wala usab mailhing mamumuno sa may national highway sa Linao, Lipata, lungsod sa Minglanilla, Cebu.

Giila ang pulis nga si PO2 Romeo Bolaño, 49, lumolupyo sa Camella Homes Subdivision sa Lawaan, Talisay City. Samdan ang kuyog niya nga si Clifford Zamora kinsa naigo sa tiil.

Niadong Pebrero 18, giatngan ug gipusil-patay usab ang vice mayor sa lungsod sa Ronda nga si Atty. Jonnah John Ungab nga maoy abogado sa misurender nga drug lord nga si Rolando “Kerwin” Espinosa Jr.

Salikwaot paminawon, kay kini nahitabo human sa iyang hearing diha sa korte sa Qimada Building sa North Reclamation Area bisan og udtong tutok.

Kining atong gipanglakbitan sa unahan, maoy pipila lang sa mga high profile cases nga naglambigit og kamatayon sa mga opisyal o mga inilang personalidad nga daw sa way kasiguroan kon maangkon ba nila ang tinud-anay nga hustisya.

Kining nahitabong sunodsunod nga pagpamatay naghatag lang usab kini og timaan nga nagusbat na diay ang pagmintinar sa kahusay ug kalinaw – nga mao unta ang responsibilidad sa atong mga tinugyanan sa balaod.