Pait nga Tinolang Isda
Nanguliad ug nag luha-luha mi og kinatawa sa among
room mate nga si Eva (tinuod ngalan gitago) human mitilaw ug mihigop sa iyang tinolang isda kay gawas nga nanglingkang ang himbis ini, grabi pa ka pait.
Ngano? Ang iyang isda way klarong hinlo, wa makuha-i og hasang ug tina-i maong napait. Misamot kay gi-deritso kini niya paglunod sa nagbukal nga tubig bisag wa pa mahimbisi maong nanglingkang ug miburot sama sa Buriring.
Grabing ka-uwaw iyang nasinati kay nahibaw-an na hinuon nga pirmiro pa ni niyang pagsuway og luto kay nagdako man sa ila nga gi-alirungan og mga katabang maong way hago ug ala senyorita.
Kini nga panghitabo kumon di lang dinhi sa ato kundi sa uban sang nasud.
Gani, sa gihimong survey ni Jeff Bennet sa The Wall Street Journal, 30% sa mga Americanong tinun-an sa kolehiyo di kahibalo bisag pag lungag og itlog. Laing 70% ang di kahibalo mo taod/tahi og butones, hugas sa kinan-an, hipos sa gikatugan, ug laba.
Usa sa akong ika-rekomenda nga solusyon nga makatabang pagsumpo ining kakuwang sa kahibalo mao ang pagbalik pagtudlo sa Home Economics.
Sukad Grade-4 hangtod karon, ang akong nakat-unan sa Home
Economics sama sa pagpanluto, pagpanahi, pangborda, pagginansilyo, panghinlo, pangguna ug pananom, panglaba, apil ang simpling pagpadagan og ginagmay nga negosyo (buy
& sell), akong nagamit.
Inig ka matngon og buot sa bata , ma lalaki o babaye, mahimo na kini nimo silang sugdan pagmatuto ining mga naandang ginbuhaton sa balay: kinamot nga panglaba sa mga gaan nga sinena, simpling pangluto sama sa prito, lung-ag, pabukal, limpyo sa kaugalingong lawak ug tugkaran, hapil sa mga butang og sinena, ilis sa mga napundir nga suga/bombilya o baterya sama sa flashlight, pananum og utanon, lagutmon o mamungang kahoy, pamalansa, atiman sa hayop ug bantay sa mga gagmay nga manghod.
Ang bata nga sayong gianad ining mga ginbuhaton seguradong magdako nga risponsabli, matinabangon, matinud-anon, indepindente og andam sa kaugmaon.