From the time you say “I love you”
Nahikatawa na lang ko sa nakita kong reaksiyon ni Gemar. Morag wa gyud siya makatuo sa iyang nakita nako. “Naunsa ka diha, Gemar? Mora man gud kag nakakitag ungo?”
Nakapangawot na lang sa ulo si Gemar ug nahikatawa sab. Nakita ko sa iyang nawong ang way pagpakaaron-ingnon nga kalipay, mao kini ang namatngonan ko nga iyang gibati.
“Kuan man gud, misamot ka man kaguwapa anang imong gisul-ob.”
Nabatyagan ko ang pagblush sa akong nawong. Apan sa hilom nalipay ko sa pagdayeg ni Gemar nako. Gipalingkod ko siya ug milingkod sab ko sa iyang atbang. Diha mi sa sala sa gipuy-an kong boarding house.
“Kanus-a ka lang nakat-on pagsul-ob anang bestida, Sofia?”
Wa ko makatubag. Naglisod ko sa pagpasabot kang Gemar. Mauwaw ko nga motug-an niya sa tinuod.
“Tan-awa, girl kaayo kang tan-awon ana. Naklaro sab ang imong kaguwapa.”
“Saba diha, uy, Gem. Tinuod ba gud nang imong giingon?”
Sa hilom, gibati ko ang kalipay sa pagpamisita ni Gemar nako karon. Kana bang kalipay nga way pagpakaaron-ingnon.
“Wa ko mamakak, Sof. Tubaga ko sa tinuod, kanus-a ka lang nakat-on sa pagsul-ob og bestida? Kanunay ka man lang gud nagkarsones, kanunay nagsul-ob og linaki?”
Nakadesisyon ko nga sultihan ko na lang sa tinuod si Gemar. Nganong itago ko pa man nga siya man gyud ang nakapausab sa akong pagtan-aw sa akong kaugalingon ug sa akong pagbati?
“From the time nga miingon ka nako og I love you.”
Nakaduko ko human ko makasulti. Mitupad paglingkod si Gemar nako sa taas nga sopa nga akong gilingkoran. Iyang gikuptan ang akong kamot. Gipasagdan ko siya sa iyang gibuhat. Namatngonan ko ang kainit sa iyang palad. “Love ba sab ko nimo, Sof?” Nagkatinan-away mi si Gemar. Nganong limdan ko pa man siya? First time pa nga mibati kog gugma ngadto sa usa ka lalaki. “Oo, Gem. Love sab tika.” Wa ko makapugong kang Gemar dihang iya kong gigakos. Ug sa unang higayon nahagkan kog lalaki sa akong lips.
Nanglabay pa ang mga adlaw. Na-feel gyud nako ang pagmahal ni Gemar. Very caring siya nako, very sweet. Samtang si Sheena nagmalipayon sab sa iyang boyfriend nga si Harry. (KATAPUSAN)