Ordinansa batok magtaptap sa Mandaue amendahon sa konseho

Amendahon sa konseho sa dakbayan sa Mandaue ang ordinansa nga modakop sa mga nagmotor lakip na ang ilang angkas nga magtaptap og bonnet o bisan unang tabon sa ilang nawong kon moagi sa kadalanan sa dakbayan.

Kini maoy gipaambit ni Bise Mayor Carlo Fortuna sa dihang nahinabi sa mga tigbalita niadtong BIyernes.

"The council is aware and mindful of all the complaints that we are receiving lately as to the implementation of the ordinance. We find some of these complaints valid," matod ni Fortuna.

Gitug-an niya nga adunay kapasikaran ang mga reklamo ug pagsupak sa mga motorista ilabi na niadtong naghambin og balatian.

Paambit sa bise mayor nga tulo ka mga aspeto ang posibleng usbon sa konseho ubos sa maong ordinansa.

Kini mao ang posibilidad nga paubsan ang multa sa mga masakpang makalapas, tugotan nga maka-sul-ob og mask kadtong adunay mga balatian ug wa nay labot ang mga traysikol drayber sa dakpon kon magtaptap ubos sa ordinansa.

Niadtong Huwebes, usa ka babaye ang nidangop sa buhatan ni Fortuna ug nagkanayon nagpaalim pa siya sa iyang sakit maong nagkinahanglan siyang magbutang og surgical mask.

“We will secure the assessment of the police and the TEAM, because the measure was introduced principally not as traffic regulation but it was a initiative on to curb the hits by riding in tandem assassin that have used motorcyles in committing the crimes,” matod ni Fortuna.

Matod ni Fortuna, tun-an pag-ayo sa mga miyembro sa konseho ang mga kausaban nga ipatuman nila sa ordinansa aron di na sila magsige og amendar niini nga mosangpot sa kalibog sa publiko.

Giangkon niya nga di perpekto ang maong regulasyon apan ang tuyo niini mao ang epektibong paglikay sa paggara sa riding-in-tandem nga nga mga kriminal nga mogamit og tabon sa nawong kon mohimo og krimen.

Sa laing bahin, si City Administrator Atty. Danilo Almendras niingon nga ang kausaban sa ordinansa posibleng matuki sa sunod semana.