GASA SA GUGMA
Daghang espesyal nga butang ang kapilian aron ihatag isip gasa ngadto sa tawo nga suod sa atong dughan labi na sa pagsaulog sa iyang adlaw nga natawhan.
May mga butang nga mahikap, apan aduna usab nga makita sa mga aksyon. Niadtong Marso 7, gisaulog ni Tomasa Guardo ang iyang 81st birthday.
Sa okasyon, nagkapundok ang iyang mga anak, mga apo ug kabanay.
Ang kamaguwangang anak nga si Jonathan 'Atan' Guardo, bisan tua sa China niadtong higayona uban sa manghod nga si Jose, ang nangu sa pagplano sa salosalo sa pamilya.
Si Atan gitabangan sa iyang mga igsuon sa pag-andam sa birthday party.
Present sa selebrasyon ang ubang mga anak ni Tomasa nga sila si Cebu City Councilor Jerry, Jeson ug Genito samtang ang laing mga anak nga sila si Angie tua sa Manila ug si Jimmy tua sa Surigao.
Niadtong Oktubre sa miaging tuig, gioperahan si Tomasa sa ospital sa siyudad sa Sugbo ug giputol ang katunga sa iyang wala nga tiil kay wala na maayo ang samad nga nagsugod sa kumagko sa iyang tiil. Siya nagsakit og diabetes.
“Dili unta niya gusto pero nahadlok mi nga magkagrabe ang kagaw basin mosaka sa utok maong gipaputol ang iyang tiil,” saysay ni Jeson Guardo, kamanghuran nga anak ni Tomasa.
Si Jeson nipaambit nga human maoperahi ang ilang inahan, nagplano na sila magsuon nga palitan kini og artificial nga tiil aron makalakaw ug makasuroy gihapon ang ilang inahan.
Matod ni Jeson, ang labing bug-at nga gasa nilang magsuon nga mahatag ngadto sa ilang inahan mao ang gugma nga way kinutuban.
“Nag-need siya sa love namo magsuon, kinahanglan namo siya nga panggaon pa more after siya naoperahan para dili siya mag-negative, pirme siya mag-positive,” dugang ni Jeson.
Ang kapikas ni Tomasa nga si Jose Sr. namatay siyam ka tuig na ang nakalabay. /