MAVS GIKITKIT SA RAPTORS
Gipangkitkit sa Toronro Raptors ang Dallas Mavericks pinaagi sa overtime, 122-115, aron irehistro ang labing taas nilang sunodsunod nga kadaugan sa ilang kasaysayan sa National Basketball Association (NBA) kagahapon.
Ang Raptors, nga ning-agi sab og grabeng pagpanghudlat sa kinatibuk-ang duwa, ningposte sa ika-11 nilang sunodsunod nga kadaugan nga nagpahugot sa ilang paggunit sa liderato sa Eastern Conference bitbit ang 52-17 nga baraha. “We make it hard on ourselves,” matod ni Raptors coach Dwane Casey. “Every team is coming in and giving their best shot. We’re learning to be the hunted instead of the hunter.” Gipangulohan ni DeMar DeRozan ang Raptors pinaagi sa iyang 29 puntos samtang niamot og 21 puntos ug 12 rebounds si Jonas Valanciunas.
“It’s cool but I think we’re all looking at it like we’ve got a bigger goal in mind,” asoy ni DeRozan.
“Every game is not going to be pretty but as long as we’re figuring out how to win and doing it in the right way, that’s all that matters to me.”
Ang Raptors, nga ningkulit sa ika-18 nilang daog sulod sa 19 ka mga duwa, ningkom- bati nga wala ang usa sa ilang labing mga sinaligan nga si Kyle Lowry.
Apan bisan pa niini, nakamaneho gihapon ang Raptors paglingkawas sa pagpanghudlat sa Mavericks, nga nahagbong sa 22-47 nga baraha ug wala na’y poruhan nga makaabante sa playoffs.
Si Delon Wright niamot og 15 puntos alang sa Raptors samtang nidugang og 14 puntos si Fred VanVleet.
Ang Mavericks gipangulohan ni Harrison Barnes pinaagi sa iyang 27 puntos, nihatag og 19 puntos si Dennis Smith Jr. samtang nitunol og 18 puntos si J.J. Barea. “A lot of positives, just not the W,” batbat ni Mavericks coach Rick Carlisle.
Ang Mavericks nakamugna og 101-93 nga labaw sa nahabiling 5:43 minutos sa regulation period sa pagpangulo ni Barnes.
Mibawos si DeRozan og upat ka sunodsunod nga puntos aron pahakan ang labaw sa Mavericks, 101-97, sa nahabiling 4:32 minutos.
Human niini, sunodsunod nga turnovers ang nahimo sa Mavericks hinungdan nga nakapugos og overtime ang Raptors.
“We turned the ball over a little bit too much there,” asoy sa sinalugan sa Mavericks nga si Dirk Nowitzki.
“We had it going there on a lot of cylinders. “Just couldn’t close, couldn’t finish, which is disappointing.”
Sa 4th quarter, 12 ang namugna nga turnovers sa Mavericks.
Sa laing mga duwa, ningdaog ang Boston Celtics batok sa Orlando Magic, 92-83, Philadelphia 76ers batok Brooklyn Nets, 120-116, Oklahoma City Thunder batok LA Clippers, 121-113, Miami Heat batok LA Lakers, 92-91, ug Sacramento Kings batok Golden State Warriors, 98-93.