Labella gitudlo nga presidente sa PDP Laban Cebu City Chapter
Pormal nang gitudlo si Bise Mayor Edgardo Labella isip presidente sa Partidong Demokratikong Pilipino (PDP) Laban sa dakbayan sa Sugbo.
Sila si Senate President Aquilino “Koko” Pimentel, Speaker Pantaleon Alvarez ug Secretary Al Cusi kinsa mao ang mga haligi sa PDP Laban ningpirma sa appointment ni Labella penetsahan og Pebrero 26 human niya nakumpleto ang mga rekisito isip miyembro sa maong grupo.
Si Konsehal Raymond Garcia, kaalyado ni Labella sa Cebu City council maoy unang nianunsyo sa pormal nga pagdawat sa bise mayor sa iyang Facebook page kagahapon.
“Its official. Vice-Mayor Edgardo Labella has been formally appointed as President of PDP-Laban Cebu City Council... “tipik sa post ni Garcia sa FB.
Si Labella una rang nibutyag nga prayoridad niya ang pagdala sa programa ni Presidente Rodrigo Duterte hilabi na ang katumanan sa Federalism, pagpakiggubat batok sa ginadling drugas ug kurapsyon sa gobiyerno.
Matod ni Labella nga dili babag alang kaniya bisan adunay laing grupo sa PDP-Laban sa Cebu City nga gipangulohan ni Lorna Bacalla sanglit managsama ra ang ilang tumong sa panerbisyo.
Gipasabot ni Labella nga ang grupo ni Bacalla para gihapon sa Pederalismo samtang sila nga mga opisyal nga naglingkod sa gobiyerno maoy ilang kaabag sa pagtunol sa batakang serbisyo ngadto sa publiko o katawhan sa dakbayan sa Sugbo.