Tanod gipatay sa Naga

Tanod patay human gipusil samtang, laing lalake ang patay usab human gidunggab sa managlahing insidente sa mga dakbayan sa Sugbo ug Naga kagahapon niadtong Sabado sa gabii.

Patay ang barangay tanod sa Barangay South Poblacion, dakbayan sa Naga dihang gipusil kini sa wa pa mailhi nga mamumuno.

Ang tanod naila nga si Reynante Fernandez, 36, kinsa gipusil sa Sitio Tinago samtang nagduwa kini og baraha alas 10:30 niadtong Sabado sa gabii.

Nasayran nga nitago diay ang mamumuno luyo sa bungbong nga ilang giduwaan og barahan dihang kalit siyang gipusil.

Didto giagi ang armas sa buslot dayon pusil kang Fernandez.

Gisubay pa kon adunay kalamibigitan sa drugas ang kamatayon niini kay nasayran nga drug surrenderer diay ni siya sa Oplan Tokhang niadtong nakalabay nga tuig una siya nahimong tanod.

Samtang sa dakbayan sa Sugbo, padayon pa nga gipangita si Raffy Lumayno, 32, kinsa giisip nga usa sa suspek sa pagpatay kang Honzel Menguito, 26, sa Sitio Mahayahay 2, Barangay Pasil.

Nasayran nga pasado alas 12 sa kaadlawon kagahapon dihang nagsukmagay ni si Lumayno ug si Menguito sa naasoy nga dapit.

Atol sa panghitabo, niapil ang igsuon niini nga si Rocky, 29, kinsa nikuha og kutsilyo ug gidunggab ang biktima diin samdan kini sa wala nga liog, tuo nga bukton ug luyo nga bahin sa abaga niini.

Nadala pa kini sa tambalanan apan gideklarar nga patay.

Nadakpan si Rocky apan padayon pa karon nga gipangita ang igsuon niini nga si Raffy.