APEKTADO SA TRAIN LAW ADUNAY P2,400
Moabot sa 317,000 ka mga balay sa Central Visayas ubos sa Listahanan o National Household Targeting System for Poverty Reduction ang ipaubos sa validation sa Department of Social Welfare and Development (DSWD) 7 sugod karong buwana. Si Ruben Boybanting, project development officer sa DSWD 7, nibutyag ang kwalipikado sa validation maoy makadawat sa tag P200 matag buwan nga cash subsidy alang sa labing kabos nga mga
pamilya nga apektado sa Tax Reform for Acceleration and Inclusion (TRAIN) Law.
Siya nipasabot tulo ka grupo ang makadawat sa tag P200 matag buwan o tingob nga P2,400 alang sa tibuok tuig ang mga benepisyaryo: Pantawid Pamilyang Pilipino Program (4Ps), indigent senior
citizens ug mga benepisyaryo sa Listahanan.
Niadtong Marso 6 ug 7, unang nakadawat sa tingob nga P2,400 ang mga benepisyaryo sa 4Ps, tug-an ni Leah Quintana, tigpamaba sa DSWD 7.
Matod niya nga sa Central Visayas, kinatibuk-ang 56,291 ang benepisyaryong mga pamilya sa 4Ps—34,724 sa Cebu; 17,445 sa Negros Oriental; 3,903 sa Bohol ug 219 sa Siquijor. “Gihatag ni (P200 cash subsidy) aron makatabang nila nga naapektuhan sa Train Law, para dili kaayo mabug-atan ang katawhan,” pamulong ni Quintana sa pakighinabi sa Superbalita Cebu.
Molungtad og tulo ka buwan ang validation sa mga benepisyaryo sa Listahan ug ang pinal nga listahan gipaabot
maandam sa Mayo. Si Boybanting nibutyag sa Hulyo ug Agusto mahatag ang itingob nga P2,400 nga cash subsidy alang sa mga indigent senior citizen, benepisyaryo sa Listahanan ug mga benepisyaryo sa 4Ps nga way mga
cash card.
Siya nipasabot nga dili tanang 4Ps nga mga benepisyaryo ang dunay cash cards kay dili tanang lugar diin kini nanimuyo ang dunay duol og Land Bank of the Philippines (LBP).
Ang P200 cash subsidy gitawag sa Department of Fi- nance nga “unconditional cash
transfer” gumikan kay ihatag kini nga way kondisyon dili susama sa 4Ps nga dunay nalatid nga mga kondisyon aron padayon makadawat ang mga benepisyaryo.
Kinatibuk-ang 10 milyones ka beneficiaries ang makadawat sa cash subsidy, 4.4 milyones ang mga benepisyaryo sa 4Ps samtang 3 milyones ang mga indigent nga senior citizen ubos sa Social Pension
Program. Ang 2.6 milyones magagikan sa Listahan.
Ang UCT ipatuman sud sa tulo ka tuig. Sa 2018, tag P200 matag buwan o tingob nga P2,400 ang madawat. Ug mosaka kini ngadto sa P300 matag buwan o tingob nga P3,600 matag tuig alang sa 2019 ug 2020.
Kinatibuk-ang P24 bilyones ang gigahin sa nasudnong kagamhanan alang sa UCT nga giapil sa 2018 national budget.