Welga sa PUJs?

Nipahibalo ang Pinagkaisang Samahan ng mga Tsuper at Operators Nationwide (PISTON) nga molusad karon sa ilang gitawag nga ‘massive transport strike’ sa pagprotesta sa tibuok nasod batok sa sa public utility vehicle modernization program sa kagamhanan. Niadtong Enero ning tuiga, gisugdan na sa kagamhanan ang pag-phaseout sa mga karaan ug kagangkagang nang PUJs alang sa kaluwasan ug walay motiurok sa dalan atol sa pagbiyahe. Dili ba gusto ang PISTON niini?

Si George San Mateo, nasudnong lider sa PISTON, niingon nga ‘anti-poor’ ang naasoy nga programa nga makaapekto sa panginabuhi sa liboan ka mga drayber sa jeepneys ug operators sa nasod.

Ang PISTON nangangkon nga 60,000 jeepney drivers ang moapil sa welga sa Laguna, Cavite, Rizal, Bulacan, Batangas ug Northern Mindanao.

Dugang ni San Mateo, maapektohan usab sa sentro sa transport holiday ang Novaliches ug Cubao sa Quezon City, Monumento area sa Caloocan City, Alabang sa Muntinlupa City, ug Anda Circle sa Manila City.

Apan dinhi sa Sugbo, base sa nangaging panawagan sa welga sa PISTON, kadudahan ang epekto o mingaw. Wa makatarog sa trapiko. Unsa kaha, dili popular sa masa ang ilang panawagan? Ang pagpanindot sa serbisyo sa transportasyon segurado nga pangandoy sa tanan. Apan supak ang sektor mismo?

Naobserbahan nga nagkaminos ang kainit sa suporta sa masa sa pagwelga sa sektor kon maghisgot na og modernisasyon sa public transportation uban sa nagkataas ang kaamgohan sa katawhan. Dili ba nga gihimo na lang kitang labayanan sa mga segunda-mano nga sakyanan gikan sa gawas sa nasod?

Hinuon, matuod ang usa sa panawagan sa PISTON nga kinahanglang abagan sa kagamhanan ang sektor sa dakong kausaban sa sektor sa transportasyon. Kinahanglan moderno na.