Thinking about you
Midiretso si Rannel sa giabangan namong cottage. Nagpamahd ko sa akong mga luha. Sagunson kong miginhawag lawom aron makuha ang kahuot sa akong dughan. May kausaban tuod ang panahon, parehas sa pagbati. Naglaom ko nga kami si Rannel forever. Aw, wa na man kunoy forever ron.
Milantaw ko sa dagat, didto sa lawom nga bahin. Nagginukdanay sa paglangoy sila si Sarah ug Jino. Ganina ra silang naligo ug wa pa gyud diay moundang. Parehas silang swimmer sa tagsa-tagsa ka university nga ilang gitunghaan. Kadaghan na sila moapil og competation sa langoy tali sa lain-laing mga university. Kadaghan na silang nakadaog.
Sila unta ang angay sa usag usa. Hilom kong nakaingon. Apan di kabut-an ang kapalaran sa gugma. Ang panahon, ang kahigyonan, maoy naghatag og dalan aning tanan. Si Rannel. Si Sarah. Kinsay magtuo nga magkabagat ang ilang dalan? Ingon ani ang kapalaran. Mangitag paagi aron ang duha ka binuhat magkaila kay sila ang para sa usag usa.
Nakapahiyom ko nga naghunahuna sa akong nabasang libro bahin sa gugma. Pahiyom nga nagdalag kasakit sa dughan.
Wa koy tingog nga misulod sa cottage. Sa taas nga bangko ko molingkod.
“Nalingaw pa man diay sila sa pagkaligo.”
Igo ko lang gipasiplatan si Rannel nga miinom og softdrinks. Naghilom gihapon ko. Wa ko ganahi sa pagtubag niya.
“Tana, Cassandra, mangaligo tag balik sa dagat.”
Kalit nga gibati ko ang kalipay. Ganina sa among pagpangaligong upat, sila si Rannel ug Sarah ang kanunay nagkadug-ol, samtang kami si Jino nagpalayo kanila. Ug karon panahon na nga magkadug-ol mi si Rannel sa pagpangaligo sa dagat.
“Di pa diay ta mamauli?” Mitingog na gyud ko.
“Mag-agad ta nila labi na kang Sarah. Kang Sarah man ang awto nga atong gisakyan.”
Miyangu-yango na lang ko. Mitindog si Rannel ug miduol nako. Milargo siyag kupot sa akong kamot. Morag naglutaw ko sa cloud nine sa kalipay nga akong gibati. Pagkadugay nang panahon nga wa ko mabatyagi ang kainit sa palad ni Rannel.
“Tana, Cassandra.”
Wa ko maglangay. Misunod dayon ko kang Rannel. Unya nagkadungan mig ambak sa dagat.
Milangoy dayon si Rannel. Milangoy sab ko. Gigukod ko si Rannel. Gusto ko siyang gakson. (SUMPAYAN)