500 NA KAPIN KA TAWO NGA NAGTAPTAP SIKOP
Sobra sa 500 na ka mga motorista ang nasikop sa Traffic Enforcement Agency of Mandaue (TEAM) nga nilapas sa ordinansa nga nagdili sa pagsul-ob og bonnet kon magmotor sa dakbayan,
Sa talaan nga nakuha ning mantalaan sa TEAM, moabot na ngadto sa 581 ka mga motorista ang nasikop ubos sa ordinansa 14-2017-1251 sa unang 5 ka adlaw nga implementasyon niini.
Ang pangulo sa TEAm nga si Glenn Antigua nagkanayon nga niubos ang ilang mga nadakpan sukad sa unang adlaw nga istrikto ilang pagpanakop sa ordinansa.
Gibutyag niya nga rason mao nga nahibalo na ang mga motorista kalabot sa balaudnon ug nga ang multa niini bug-at sa bulsa nga moabot ngadto sa P5,000.
Niadtong Marso 12, unang adlaw sa implementasyon sa ordinansa, moabot ngadto sa 120 ang mga nadakpan; 173 ang nasikop niadtong Marso 13; 161 ang nasikop sa milabayng Miyerkules; 77 pag Huebes ug 50 niadtong Biyernes.
Hinumduman nga sa milabayng semana, nipadayag si Bise Mayor Carlo Fortuna nga usbon ang maong balaudnon nunot sa mga reklamo nga nadawat sa ubang motorista.
Si Fortuna nagkanayon nga mahimong makasul-ob og taptap sa nawong kadtong mga adunay sakit nga gihambing, possibleng paubsan ang multa ug di na ilakip niini ang mga traysikol drayber sa panakpon sa ordinansa.
Uyon si Antigua kalabot sa medical certificate apan ubos sa mga kondisyon.
Nisupak sab siya sa sugyot nga paubsan ang multa tungod kay di kini patas sa mga nakabayad na ug labawng di siya mosugot nga di apilon ang mga traysikol drayber.
Matod ni Antigua, ikonsiderar niya kadtong mga magpa-medical apan isip precautionary measures, buot niya nga uniporme ang taptap sa tanang ma-exempt nga magsul-ob og mask.
“Kining surgical mask ibutang, walay laing ibutang sa nawong. Then, if naay mahitabo, kung naay suspect sa usa ka insidente nga nagsurgical mask, suspek silang tanan,” matod ni Antigua sa Superbalita Cebu.
Paambit niya nga si Atty. James Allan Sayson sa City Legal Office nisugyot nga aron kalikayan ang peke nga medical certificate, tanang mga medical certificate kinahanglan adunay pirma sa doktor gikan sa City Health Office (CHO).
“Atty. Sayson suggests nga every four months, irenew ilang medical certificate then sa ilang medical, I-attach ang kopya sa valid ID nga pagmatuod nga sila gyud,” matod ni Antigua.
Gitataw sab niya nga kon usobn man gani ang ordinansa, di na hilabtan pa ug paubsan ang multa niini aron wa nay dugang hasol.
“Kung naay ammendments, kato nalang sa katong naay mga medical. Ang fine steady nalang na siya kay kung moana ta nga refunan nga lisod baya refunan ang government ha,” dason niya nga usa sa ilang nadakpan ang nibahad nga magparefund kon paubsan ang multa.