Pilia og tarong ang mga proyekto: RDC

Duha ka mga opisyal sa Regional Development Council (RDC) 7 niawhag sa Department of Public Works and Highways nga pilion ang mga proyekto nga mahan-ay sa master plan.

Si Kenneth Cobonpue, co chairman sa RDC 7, namahayag nga aron masulbad ang kahuot sa dagan sa trapiko sa Sugbo kinahanglan nga unahon ang minos ang magasto apan labing epektibo, una niii mao ang pagpalambo sa mga intersection.

Matod niya, kini base sa pagtuon sa Japan International Cooperation Agency ( JICA), diin ikaduha ang pagbaton og intelligent traffic system.

“Outdated na ang atong traffic system diri. Synchronized kanang traffic nga puno na kaayo didto ipa-longer ang area traffic control,” pamulong ni Cobonpue atol sa press conference kagahapon.

Sigon niya ang paghimo og flyover, underpass ug pagpalapad sa karsada ang naa na sa katapusan sa order of sequence base sa initial report sa pagtuon sa JICA.

“Ang gibuhat sa atong mga politicians, giuna nila ang ilahang mga flyover ug underpass kay ngano? Kahibawo man ta ngano...Giuna (nila) ang expensive items,” dugang sa chairman sa RDC 7.

Sa suwat sa JICA nga gi-address kang Gobernador Hilario Davide III niadtong 2016, apil sa mga rekomendasyon niini ang pagpalambo sa traffic management by section, modification sa geometric designs ug traffic signal, area traffic control, pag-synchronize sa traffic signals ug area wide traffic control system.

Si Glenn Anthony Soco, co chair sa Infrastructure Development Committee sa RDC 7, namulong ang geometric improvements kay mao ang ilang giduso aron maapil sa budget sa DPWH.

Si Cobonpue nagkanayon nga angay nga maghimo daan og alternatibo nga agianan o mag-abli og bag-o nga dalan ang DPWH nga mas ubos ang magasto kon itandi sa pagpatukod og underpass o flyover.