RDC gisaway ni Osmeña; opisyal mipasabot nganong proyekto wa dayon uyoni
Gidepensahan ni Cebu City Mayor Tomas Osmeña si Kongresista Raul Del Mar human nibiya sa meeting sa Regional Development Council (RDC) 7 niadtong Biyernes.
Si Osmeña nagtuo nga gisabotahe sa mga opisyal sa RDC 7 nga gipangulohan ni Kenneth Cobonpue, isip co-chairman kinsa suod nga higala ni Presidential Assistant Michael Dino, nga babagan ang mga proyekto sa Dakbayan sa Sugbo nga iyang gihulagway nga makatabang sa huot nga trapiko.
“They are not helping anything. Those guys don’t know anything. They have bad intentions and no competence,” matod ni Osmeña.
Si Del Mar wa nitiwas sa meeting human iyang nasayran nga wa iapil sa rekomendasyon sa RDC ang mga proyekto nga alang sa dakbayan sa Sugbo.
Ang mayor nagkanayon nga inay mohatag og go-signal ang RDC nga ipadayon ang proyekto nga gisugdan na sa pag-asikaso sa Department of Public Works and Highways dinhi sa Cebu City, gitahasan na hinuon sa paggama og feasibility study.
“What Del Mar’s intention was, proceed with the construction already. Why do we have to delay the whole thing by conducting a feasibility study when they already conducted it?” nangutana si Osmeña.
Apan gipadadayag ni Osmeña nga bisan kon wala iapil sa RDC sa ilang prayoridad ang mga proyekto sa Cebu City, ipadayon gihapon kini niya sa iyang kaugalingon nga paningkamot.
“I will build faster than they can destroy,” matod ni Osmeña.
Samtang, si Cobonpue nipasabot nga gusto nila nga mapalambo ang di maayong plano sa DPWH sa mga proyekto.
“Kinsa may incompetent? Kada pangutana namo unsay inyong data, di man sila (DPWH) ka-provide. It’s easy to call names,” padayag ni Cobonpue sa press conference kagahapon.
Ang ilang pagkwestyon sa mga proyekto nga buot ipatuman sa DPWH kay gibase sa mga pagtuon ug scientific data nga gihatag sa mga eksperto sama sa gihimo sa Japan International Cooperation Agency ( JICA).
Matod niya, nga technical sila manubag tungod kay nagtamod sila sa mga scientific data nga resulta sa mga pagtuon sa JICA.
“We just want it in sequence. Unaha una ang improvements sa intersection,” dugang ni Cobonpue.
Si Glenn Anthony Soco, cochair sa Infrastructure Development Committee, subcommittee sa RDC 7, niklaro nga wa sila mobabag sa mga proyekto sa DPWH labi na ang giduso ni Del Mar.
Gusto nila mahuman ang feasibility study nga pasiugdahan sa DPWH 7 aron matino kon unsay angay nga buhaton sa pagsulbad sa dagan sa trapiko sa mga dapit nga giila sa kongresista nga grabe ang kahuot sa dagan sa trapiko.
Siya nidugang kon mogawas sa feasibility study nga underpass ang angay himuon, andam sila mopaluyo niini.
“Again we’re not blocking... We are only transmitting what the experts are providing us. We are guided by a master plan,” matod ni Soco.
Matod ni Osmeña, walay nahimo ang kasamtangang liderato sa RDC 7 lakip na ang unom ka tuig nga pagdumala sa iyang karibal nga si kanhi mayor Michael Rama.