PNP way mahimo sa mga gun-for-hire?

“Kuyawa gyud diay ron sa Cebu. Permi naman dunay patay. Kuyawan na hinuon ta mosuroy, da.”

Kini maoy usa lang sa mga negatibong komento nga nagpusot-pusot sa social media kagahapon sa dihang nabaniog ang lain na usab nga pagpangambus ngadto sa usa ka opisyal sa Bureau of Jail Management and Penology (BJMP).

Si Edwin Sarcon, 53, jail inspector sa BJMP, ang samdan sa iyang li-og sa dihang gipusil kini samtang nagmaniho sa iyang sakyanan paingon na unta sa BJMP headquarters.

Ang pagpamusil nga posibling giayudahan sa tulo ka mga wailhing tawo nahitabo alas 7:30 sa buntag sa R. Duterte Street eskina V. Rama Ave., Barangay Guadalupe, dakbayan sa Sugbo.

Giingon nga nagmotorsiklo ang mga armadong buot mohunos sa kinabuhi ni Sarcon, kinsa kanhi assistant warden sa Talisay City Jail.

Kining maoy dugang sa hapit inadlawng pagpamanhig sa Sugbo sukad niadtong pagpusil-patay ni Atty. Jonah John Ungab, vice mayor sa Ronda, usa na ka buwan ang nakalabay.

Hangtod karon pabiling nga wala gihapoy bisan anino na lang nga mogiya sa kasulbaran sa maong panghitabo.

Tungod niini, mitumaw ang mga pangutana. Unsa man diay karon ang gihimo sa atong mga kadagkuan sa Philippine National Police (PNP) aron pag-alkontra niining yano ra nga pagpamatay nga nakahatag og balisa sa publiko?

Ingon ani na ba diay ka inutil ang atong mga tinugyanan sa balaod nga daw sa wa sila makakita og tukmang pamaagi nga makapakgang niining mga krimen nga mahitabo bisan og adlawng dako?

Giingon nga sagad nga mohimo niini mga gun-for-hire. Buot ba ipasabot nga gilupig og taktika ang atong puwersa sa PNP niining mga tawhana? Kini maoy dakong hagit sa atong kapulisan.