Dugong Cebuana sa Bb. Pilipinas
Dugaya nagdaug sa Bb. Pilipinas, ala-1:17 na sa kaadlawon nahuman (Marso 19, Lunes).
Sa wala pa ang resulta, nag-monitor ko sa online, apan wa kay laing mabasa kundi fake news. Pastilan!
Hasta ang Wikipedia sa Bb. Pilipinas, gibutangan og winners, abi nakog mao na to, pagtan-aw nako sa livestreaming mao pa lang diay pag-announced sa Top 15.
Duna say niingon nga gilangaylangay kay kinahanglan kuno ang announcement sa winners dapat live gyud sa ABS-CBN.
Wala man dayon kasugod ang Bb. Pilipinas sa ABS-CBN kay gihuman pa man ang programang “I Can See Your Voice.”
Mao tingaling wala na gipasalida ang “Gandang Gabi Vice”, aron dili na maabtan og siyamsiyam.
KALIWAT
Ang nakadaug sa Bb. Pilipinas 2018 Intercontinental nga si Karen Gallman, Bohol ang iyang gidala nga probinsya kay ang iyang mama maoy taga-Bohol ug ang iyang papa Australyano.
Apan kahibawo ba mo nga duna sad ni siyay dugong Cebuano?
Naa siyay daghang paryente sa lungsod sa Compostela nagpuyo.
Ang lola sa classmate sa akong anak maoy nitug-an nga ilang pag-umangkon si Karen Gallman. Kay ang lola kuno ni Gallman ug ang ilang lolo managsuon.
TOP 25
Ang taga-Bacolod City ug duna say dugong Cebuana nga si Ena Louis Velasco igo ra nakasud sa Top 25 sa Bb. Pilipinas.
Sa atong interbyu, niangkon si Ena nga pressured gyud siya sa kumpetisyon kay mga sikat ang iyang kontra, but win or lose, dili kuno kabayran og sapi ang iyang kasinatian sa maong pageant.
Si Ena gradwado sa Doctor of Medicine sa Southwestern University ug post-graduate intern karon sa Adventist Medical Center Manila.
PINAKALIG-ON
Sa mga Cebuana, nidaug sad si Eva Patalinjug isip Bb. Pilipinas 2018 Grand International. Si Patalinjug kanhi 2014 Mutya ng Pilipinas-Asia Pacific International winner.
Karon nga batch sa Bb. Pilipinas ang giingong pinakadaghang lig-on, pero sukad pagsugod crowd favorite na si Catriona Gray nga maoy mahimong Bb. Pilipinas-Universe.
Gihakot sad ni Catriona ang halos tanang special awards nga first time nga nahitabo sa kasaysayan sa Bb. Pilipinas.
TUBIIIG!
Happy b’day ni Dodoy Teberio alyas “Tubig Queen” nga magselebrar sa iyang birthday karong Marso 23. Karong Marso 25 mao sad kuno ang ilang Teacher’s licensure board exam. Good luck!/