Thinking about you
Diha sa akong hunahuna nga kon maapsan ko si Rannel sa paglangoy, mokabyon ko sa iyang buku-buko aron magakos ko siya. Anad sab mi sa langoy si Rannel sa probinsiya nga among gipuyan. Duol ra sa dagat ang among mga balay. Nuon, usahay kon wa mi klase mouban ko nila ni Mama ug Papa sa pag-adto sa among uma sa bukirang bahin aron motabang sa pag-atiman sa among mga tanom nga mais ug mga utanon. Duna sab mi gamay nga kalubian.
Samtang si Rannel anha ra sa lungsod nga among gipuyan. Duna silay dakong sari-sari store. Maayo ang pagkabutang nila ni Rannel.
Duol na ko kang Rannel. Mikapay ko pag-ayo aron maabtan ko siya apan nakit-an ko si Sarah nga kusog nga milangoy padulong kang Rannel. Naunhan ko ni Sarah sa pag-abot kang Rannel. Mikabyon dayon si Sarah sa lawas ni Rannel. Mlipayon kaayo siya. Nasagmuyo ko. Morag nawad-an kog kusog nga mihunong paglangoy. Misawom sila si Rannel ug Sarah. Dugay sila sa ilawom sa dagat. Parehas silang tag-as og utong.
Hilom na lang kong nakapanghupaw.
“Adto ta didto, Cass.”
Nakalingi ko kang Jino nga wa nako mamatikdi nga miduol diay nako. Miyango ko ug miuna ko pagsawom paingon sa lugar nga gitudlo ni Jino nako, didto sa daplin sa dagat nga dunay mga dagkong bato sa baybayon. Mihaw-as ko sa dagat pag-abot ko sa daplin. Hinay kong milakaw paingon sa maong mga bato. Misunod si Jino nako. Miyaka ko sa balas ug naglantaw kanila ni Rannel ug Sarah nga ning higayona nagginukdanay sa paglangoy. Mitupad si Jino nako. “Sweet kaayo sila, no?” Wa ko motubag. Namatikdan ko nga buotan si Jino anko. Nagkaila mi tungod kang Sarah. Suod sila kay parehas man silang swimmer sa tagsa-tagsa ka university nga ilang gitunghaan. Samtang kami si Sarah ug Rannel usa ra ka university ang gieskuwelahan maong nagkaila sila si Rannel ug Sarah, ug nagkaila sab mi si Sarah tungod kang Rannel.
Nadani si Sarah sa kaguwapo ni Rannel. Ug si Rannel sab nadani sa kaguwapa ni Sarah. Maong nagkatrato sila. Gikaguol kaayo nako kini kay naglaom ko sa gugma ni Rannel. Apan di gyud tingali mi para sa usag usa.
(SUMPAYAN)