MAGNOLIA MOTAPOS SA SERIES; NLEX DI MOSUGOT
Langkaton og suway sa Magnolia Ang Pambansang Manok Hotshots ang ikaduha ug katapusang luna sa finals sa ilang pagpakigbatok og balik sa NLEX Road Warriors karong gabii sa Game 6 sa ilang semi-finals series sa Philippine Basketball Association (PBA) Philippine Cup sa Araneta Coliseum.
Ang Hotshots ni coach Chito Victolero ninggamit sa gikahadlukan nilang depensa aron makmakon ang Road Warriors, 87-78, sa Game 5 nga maoy naghatag kanila og 3-2 nga bintaha sa best-of-7 series.
Ang kadaugan karon sa Hotshots mao ang makahatag kanila og katungod sa pagpakigharong sa three-time defending champions San Miguel Beermen alang sa bestof-7 championship series.
Apan labing seguro, dili bastabasta motugot niini ang Road Warriors, nga gilaumang mohabwa sa tanan nilang makaya aron makapugos og deciding game.
Nasayod ang Hotshots nga wala pa sila’y rason nga magmaya ning puntoha ug kinahanglan pa nilang mokayod og insakto.
Sa samang komperensya sa miaging season, ang Hotshots nakaposte sab og 3-2 nga bintaha sa semi-finals series batok sa Brgy. Ginebra Gin Kings.
Apan sa wala damha, gisagunsonan og duha ka mga pilde sa Gin Kings ang Hotshots aron pag-abante sa finals.
Wala nakalimot ang Hotshots ning maong kasinatian ug gipangandaman nila’g maayo nga dili na kini mahitabo og balik.
“We need to learn from our experiences last season. Kasi ganitong-ganito 3-2,” matod sa usa sa mga sinaligan sa Hotshots nga si Ian Sangalang.
Hindi namin pwede ibigay sa kanila. Gusto namin kuhanin yung game. So ipupush namin kung anung magagawa namin, kung anung kaya naming gawin, gagawin namin,” matod Sangalang sa PBA.ph.
Kon buot hunahunaon, kaduha napakyas ang Hotshots sa semi-finals series nga engkuwentro sa miaging season hinungdan nga grabe ang ilang pagmatngon ning higayuna.
Si NLEX coach Yeng Guiao mireklamo sa mga tawag sa referee sa Game 5 hilabi na sa hinapos nga bahin.
Alang kaniya, usa kini sa dakong hinungdan nga nagkalisod sa maong kombati bisan sa grabe nilang paningkamot.
“Pero mahirap ngang makabuwelo nga kung may may bad calls going against us. Psychologically, mabigat na imanage yung frustration doon sa mga nangyari,” pasabot ni Guiao.
Gawas sa mga tawag sa referee, usa sa dakog problema ni Guiao mao ang pagpadaplin sa usa sa iyang mga sinaligan nga si Kevin Alas, kinsa naangol sa Game 5.
Magnolia (87)-Barroca 18, Lee 15, Ramos 15, Sangalang 12, Simon 7, Dela Rosa 6, Pascual 4, Reavis 4, Brondial 2, Gamalinda 2, Jalalon 2 NLEX (78)- Ravena 21, Mallari 13, Soyud 11, Fonacier 9, Miranda 8, Quiñahan 8, Rios 3, Taulava 2, Tiongson 2, Baguio 1.