Horn dunay gitagana nga makapakurat ni Crawford

Makugang si Terrence Crawford sa higayon nga makig-away na kini kang World Boxing Organization (WBO) welterweight champion Jeff Horn sa umaabot.

Mao kini ang gipabuhagay sa trainer ni Horn, kinsa miilog sa WBO title gikan sa mga kamot ni Filipino boxing icon Manny Pacquiao niadtong Hulyo 2 sa miaging tuig pinaagi sa unanimous decision sa Brisbane, Australia.

Ang away nila ni Horn ug Crawford orihinal nga gikatakda karon untang Abril 14 sa Las Vegas apan nauswag kini gumikan kay naangol si Crawford. Kon wala’y kakulian, karon kining Mayo 19 mahitabo o sa sayong bahin sa Hunyo.

Gipasabot ni Rushton nga ang makapakugang ni Crawford mao ang kusog ug kondisyon ni Horn.

“I remember seeing that wry smile on Manny Pacquiao’s face after the first round against Jeff as if to say ‘Boy, this is going to be much tougher than I thought’,’’ matod ni Rushton sa interbyu sa www. boxingscene.com.

“It’s going to be a blistering fight and we fully intend to shock the world just as Jeff did in beating Pacquiao.”

Si Horn adunay 18-0-1, 12KOs nga rekord samtang si Crawford (32-0, 23 KOs).

Giangkon ni Rushton nga aduna sa’y kusog si Crawford ug napamatud-an kini dihang sunodsunod niyang gipangtumba ang mas bug-at niyang mga nakontra.

“Jeff is a much bigger guy at welterweight than anyone Crawford has fought. Our plan is to win the first round and every round until the fight ends. We can’t let Crawford get in front and make us play catch-up,’’ dugang ni Rushton.