Alas walo pa ka buwan makabalik?

Gibanabanang molanat og walo ka mga buwan una makabalik og duwa ang usa sa mga sinaligan sa NLEX Road Warriors nga si Kevin Alas human kini naangol sa ilang kapildihan batok sa Magnolia Ang Pambansang Manok Hotshots sa miaging gabii sa PBA Philippine Cup semi-finals series.

Nasayran nga nakasinati si Alas og anterior cruciate ligament (ACL) sa iyang tuo nga tuhod.

“Initial diagnosis of Dr. (Raul) Canlas is ACL tear. I’ll be out for eight months,” pagbutyag ni Alas sa ABSCBN News.

“I have an MRI scheduled at 2:30 p.m. for further analysis.”

Mismong si NLEX coach Yeng Guiao mikompirmar nga dili na makabalik sa series si Alas, kinsa nakasinati ning maong angol 40 pa ka mga segundos ang minglabay gikan sa pagsugod sa Game 5.

“Pag-preno ko, kumapit ‘yung sapatos ko eh,” matod pa ni Alas human sa Game 5.

“It’s very frustrating on my part. Naiyak ako doon sa gilid ng bench kanina, kasi gusto ko makatulong eh. Helpless, wala akong magawa.”

Gipasabot ni Alas nga gusto unta niyang mobalik og duwa sa 2nd half sa Game 5 ug iya lang antuson ang sakit apan wala motugot ang coaching staff niini.

Napahimuslan sa Hotshots ang pagkawagtang og sayo ni Alas sa pagrehistro niini og 87-78 nga kadaugan nga nakahatag kanila og 3-2 nga bintaha sa best-of-seven series.

Si Alas nag-average og 11.1 puntos, 5.11 rebounds, ug 2.72 assists sa Philippine Cup, mga numero nga lisod tapakan sa Road Warriors.