2018 World Bodybuilding Championships sa Sugbo ipahigayon, May 31-June 3
Gibanabanang moabot ngadto sa dul-an 300 ka mga atleta gikan sa 30 ka nagkalainlaing nasod ang gipaabot nga mosalmto NAC World 2018 Bodybuilding and Fitness Championships nga ipahigayon dinhi sa Sugbo karong Mayo 31 ngadto sa Hunyo 3.
Kini maoy unang higayon nga ang maong kompetisyon nga gipahigayon sa Spain sa niaging tuig, anhi sa Asia pagahimuon, ug ang Sugbo maoy napili nga mo-host.
Si Dennis Delgado, sa Work- out Fitness Center kinsa mao ang local chief organizer, mibutyag nga anha himuon ang usa sa pinakadakong bodybuilding competition sa tibuok kalibutan sa EIC Convention Center sa Mabolo, dakbayan sa Sugbo.
Ang mga nasod nga kompirmadong mosalmot o mopadala og representatives sa maong kompetisyon mao ang Belgium, Estonia, France, Greece, Hungary, India, Indonesia, Iran, Israel, Italy, Kuwait ug Latvia.
Mikompirmar usab ang Lithuania, Malaysia, Netherlands, New Zealand, Norway, Poland, Romania, Russia, Slovakia, Spain, Turkey, Ukraine, United Kingdom ug UAE.
“So far, kana pa ang sayo nga mi-comfirmed. Pero we’re expecting some more kay ang uban gyud ari ra na sa duolduol na sa event mo-decide,” matod ni Delgado.
Si Harald Hoyler, ang World President sa NAC International, Inc., ug ang mga kadagkuan sa Philippines NAC Federation nga sila si Ms. Therese Yupangco ug Patrick Tan ang motambong ug misaksi sa nahisgutang kalihukan.
Ang panagtigi sa padakanay ug papormahay sa lawas gibahin ngadto sa napulo ka mga kategoriya.
Kini mao ang Ms. Shape, Men’s Physique, Men Athletic, Ms. Figure, Masters, Juniors, Ms. Fitness, Men Body, Couples ug Men’s Novice Class nga alang niadtong wala pa makaapil og mga international competitions.
Matod ni Delgado nga ang mga delegasyon nga gikan sa nasod moabot sa Sugbo mga duha o tulo ka adlaw sa dili pa ang proper competition.