PULIS ‘NANGILKIL’, NADAKPAN
TANANG SAKOP SA PARIAN POLICE GIHULIPAN
Usa sa tulo ka mga pulis nga sakop sa Parian Police Station ang nasikop sa entrapment operation sa mga sakop sa Counter Intelligence Task Force Visayas human giingong nangilkil sa inahan sa ilang dinakpan sa kaso sa illegal nga drugas.
Tungod niini, girelibuhan sugod kagahapon ang 39 ka mga pulis sa mao nga buhatan.
Ang nasikop mao si PO3 Ritchie Saquilabon, sakop sa Drug Enforcement Unit (DEU) samtang wa una nganli sa Cebu City Police Office ang laing duha ka mga pulis nga iyang kauban ug usa ka barangay tanod.
Usa ka Richie Lubas ang ilang nasikop sa miaging buntag, apan wa nila dad-a sa police station aron i-blotter samtang naghimo sila og negosasyon sa inahan niini.
Giingong nangayo sila si Saquilabon og P20,000 bugti sa pagbuhi sa iyang anak nga naa sa ilang kustodiya.
Ang inahan ni Lubas nga si
Gloria nitaho sa Camp Crame pinaagi sa text message ug gipahibawo dayon ang CITF dinhi sa Sugbo alang na sa entrapment operation.
Nianang pagkahapon, wa magtuo si Saquilabon nga ang iyang gika transact sa cellular
phone di na si Gloria, kon di mga operatiba na sa CITF.
Giplanohan ang entrapment operation samtang nagpadayon ang komonikasyon sa mga suspetsadong pulis.
Sila si Saquilabon nimando nga mag-abot sila sa gawas sa buhatan sa Department of Social Welfare and Development 7 sa Barangay Carreta sa syudad sa Sugbo.
Apan nihatag na usab og laing lugar sila si Saquilabon nga mahimong didto sila magabot apan nakahukom sa Sanciangko eskina Junquera ihatag ang kwarta.
Sa dihang natunol na ang P20,000, gidakop dayon sa CITF si Saquilabon samtang ang duha niini ka mga kauban nakasibat uban sa usa ka barangay tanod.
GIRELIBUHAN
Tungod sa maong panghitabo, si Central Visayas Police Director Chief Supt. Robert Quenery nipatawag dayon sa tanang station
commanders sa Cebu City Police Office lakip na si Sr. Supt. Joel Doria alang sa usa ka emergency command conference.
Kagahapon, nilingkod na isip bag-ong hepe si Chief Inspector Kenneth Paul Albotra ug duna na say bag-ong mga pulis nga gidestino.
Nangayo, matod pa sa pagpasabot, si Queneryl nganong nahimo sa pulis ang pagpangilkil sa inahan sa ilang dinakpan.
Dinhi gipangkasab-an ni Quenery ang maong mga opisyal nga bisan sa ilang pagpaningkamot nga mabalik ang respeto sa katawhan kanila, naghimo na usab kining negatibo dungan sa pagmando nga parelibohan ang tanang mga sakop sa Parian Police Station, apil na ang hepe niini nga si Police Chief Inspector Ramoncillo Sawan. /