Feasibility study sa 3 ka mga underpass gisugdan na diay

Gikatakdang mahuman ang feasibility study (FS) sa tulo ka underpass hinapos niining tuiga nga gikatakdang tukoron sunod tuig sa tulo ka mga lugar sa Cebu City north district.

Si Kongresista Raul Del Mar nagkanayon nga gisugdan na ang maong pagtuon nga gidumala sa Department of Public Works and Highways (DPWH) 7 sa wa pa gipahigayon ang panagtigom sa mga opisyal nga naglangkob sa Regional Development Council (RDD) 7.

Ang mga underpass tukoron gikan sa barangay Talamban paingon sa Gorordo Avenue (lagbas sa Archbishop Reyes ug Bantal road).

Ang ikaduha magsugod sa Salinas Drive-Pope John Paul II lahos sa Serging Osmeña Avenue sa North Reclamation Area.

Ang ikatulo molagbas gikan sa F. Cabahug st. sa Barangay Kasambagan paingon sa Hernan Cortes, utlanan sa Cebu City ug Mandaue City.

Si Del Mar niasoy nga wa na siya nitiwas sa sa RDC meeting niadtong Marso 16 sanglit, matod niya, wa na kinahanglana ang iyang presensiya.

Siya nagtuo siya nga alang na sa katukoran ang pundo nga gipangayo nga nalatid sa full council sa RDC apan iyang nahibaw-an nga para kini sa pagahimuon nga feasibility study.

Matod niya, giduso sa DPWH-7 sa iyang buhatan ang maong mga proyekto ug iyang gipirmahan para alang sa construction.

Wa siya mahibawo nganong nausab ug nahimong para sa feasibility study.