Palma nasubo sa pagpasar sa divorce bill
Nasubo si Cebu Archbishop Jose Palma sa pagpasar sa Kongreso sa Divorce bill ilabi na nga sagad sa mga Pinoy mga Katoliko.
Apan malaumon kini nga di mosunod ang Senado sa gihimo sa mga kongresista.
“Mao kini ang atong pangandoy no, nga maghuna-huna gyud kita nga mao kini ang direksyon sa atong gobyerno ug bisan pa sa atong congressman, nga we begin to put a question mark sa ilang discernment ug sa ilang allegiance kinsa man ang atong gidapigan or unsa man gyud atong huna-huna ani nga tanan?,” padayag ni Palma.
Dugang ni Palma nga mapamalandungan sa mga senador ug di kini nila nga ipasar.
“Pero in truth I’m very
hopeful nga sa senate di kini mapasar,” matod sa amahan sa Artsidiyosis sa Sugbo.
Subay niining nagsingabot nga Semana Santa nanghinaot usab ang simbahang Katoliko nga mapamalandungan kon unsay maayong ikahatag niining pagpasar sa Divorce bill sa Kongreso niadtong Lunes.
Sa botasyon nga gihimo sa mga kongresista, 134 ang nibotar nga pabor sa Divorce bill, 57 ang supak ug duha ang ni-abstain.
Nasayran nga ang Pilipinas nalang ug ang Vatican City mao ang nahabiling nasod sa kalibutan nga wa mopatuman og diborsyo.
Dako hinuon og pagsalig si Palma nga kadaghanan sa mga senador ang nagtuo sa kabililhon sa kaminyuon.
“I think most senators are even more independent minded, kon hunahunaon as they plead, they really discern for the good of the country,” dugang ni Palma.