P120 ipadugang sa sweldo sa Central Visayas

Dugang P120 sa minimum nga suholan sa Central Visayas ang iduso nga petisyon sa Associated Labor Unions-Trade Union Congress of the Philippines (ALU-TUCP) ngadto sa Regional Tripartite Wages and Productivity Board (RTWPB) 7.

Kini mao ang ikaduhang petisyon nga pausbawan ang suholan sa Central Visayas human miduso na sa ilang P155.80 nga usbaw ang Cebu Labor Coalition, NLM-Katipunan, Metaphil Workers Union, ug Unionbank Employees Association niadtong Pebrero.

Matod ni Atty. Nora Analyn Diego, bag-ong regional vice president sa ALU-TUCP, nga ang P120 nga usbaw nga ilang gipangayo, dili pa kini tungod sa Tax Reform for Acceleration and Inclusion (TRAIN) law.

Base sa ilang petisyon nga niadtong Pebrero 2018, gibase na usab sa purchasing power sa kasamtangan nga P366 nga daily minimum wage sa Central Visayas anaa lang sa P308.34.

Kini nagpasabot nga mao lang kini nga kantidad ang magamit o mapalit sa usa ka kawani nga nagsweldo og minimum.

Dugang ni Diego nga sa niagi nga mga tuig usa ang Central Visayas nga adunay dakong natampo sa gross national domestic product (GNDP) diin ika upat kini lukop nasod.

“Despite gains in the economy and productivity, workers and their familes, have not been granted a single peso in real wage increase since 1989;” tipik sa ilang tulo ka pahina nga petisyon.

Posible nga karong adlawa maduso ang petisyon kon wa pa kini hingpit nga maduso kagahapon sa hapon.

Kon aprobahan kini sa board mamahimo na unya nga P486 ang minimun nga suholan lukop Central Visayas.

Labing uwahi nga nausbawan ang suholan sa rehiyon niadto pang Marso 2017 diin anaa lang sa P13 matag adlaw ang giaprobahan.